Omainda ga gundike aahogololi aanuulema

Aanuulema oyendji oya thigwa taya ipolithile yoyene pomahala gokuhogololela mesiku lyomahogololo, aataleli yomahogololo yoSouthern Africa Human Rights Lawyers (SAHRL) ya hokolola kutya omahala gokuhogololela ga konda petata ngoka ga talelwa po kaataleli mbaka kaga li omawanawa naanuulema.



Ooahenda yuuthemba womuntu oya gandja uuyelele mbuka molopota yawo yopetameko yomesiku 30 Novemba, konima sho ye ya moshilongo okutalela omahogololo ngoka opo ga hulu gIilyo yOmutumba gwoPashigwana nogoPaupresitende.



Omahogololo oga sindanwa po kongundu yoSwapo nokokandidate yawo yopaupresitende, Netumbo Nandi-Ndaitwah.



Aanuulema 21 785 oyi ishangitha ya hogolole, shi ikolela komishangwa dhopambelewa dhOkakomisi kOmahogololo moNamibia. Muka omwa kwatelwa aanuulema (16 128) noshowo aaposi (3 202) noombolo (1 744).



“Kapwa li omahala omawanawa naanuulema, shoka she eta omahala gokuhogololela goopelesenda 57.5% gaa yiwe kaanuulema. Okuya po nuudhigu pomahala ngaka okwe etwa sho omahala gokuhogololela ge li pela lyopombanda nogaa na iiyakulitho yaanuulema nenge omahala inaga lalakana, noga ningi omainda,” omunadiplomate gwoSAHRL professor Talent Rusere a ti.





Iizemo ya yooloka



Payelekanitho, aataleli ya za moSouthern African Development Community (SADC) oya popi sha yooloka kombinga yokuya po kwaahogoli aanuulema pomahala gokuhogololela.



Molopota yawo yopetameko, aataleli yolutuwiliki lwopashitopolwa oya holola kutya okuya po kwaanuulema pomahala gokuhogololela okwa li poopelesenda 87.5%, nomahaala gokuhogololela owala goopelesenda 12.5% omawinayi kaahogololi aanuulema.



“Okuya mo nuudhigu okwe etwa komahala gokuhogololela ge li pela lyopombanda nopwaa na iiyakulitho yaanuulema nenge ge li pomahala inaga lalakana, shoka sha ningi omainda,” olopota ya holola.



Omiyalu dha gandjwa kaataleli mbaka yaali odha guma owala omahala gokuhogololela ngoka ya talele po, oshoka inaya talela po omahala agehe, ngoka ga li ga konda po 4 500 moshilongo ashihe.





Ekwatele mo lyaayehe lya tumbalekwa



Pokati mpoka, molopota yawo, aataleli ya za kehangano lyUukumwe wAfrica oya pandula Okakomisi kOmahogololo moNamibia sho mokati kaanambelewa yako mu na aanuulema.



Ongundu yAataleli ya za menenevi oya ulike kutya okutopolwa kwaahogololi yi ishangitha ye na uulema okwa kwatha Okakomisi kOmahogololo moNamibia ka tule po omahala gokuhogololela gaahogololi ye na uulema wontumba, nosha kwathwa ya yakulwe nawa pampumbwe dhawo.



“Aataleli oya ndhindhilike wo onkambadhala yokakomisi yoku ya tsa omukumo ya kuthe ombinga miinyangadhalwa yomahogololo pakulongitha omaigidho-indilo taga hokitha melongo lyomahogololo, ngaashi eigidho- indilo lya 'Touch and Feel' lyaahogololi aaposi. Oombapila dhokuhogololitha nodhelongo lyomahogololo odha tulwa melaka lyaaposi lyobraille omanga elaka lyoshimbolo ( sign language) olya longithwa koombolo,” olopota ya holola.





Kape na ekwatho



Oolopota dhiikundaneki odha holola nkene aahogololi oyendji aanuulema olundji ya keme kOkakomisi molwa omahala gokuhogololela kaage shi omawanawa naanuulema noga ndopa okukwatela mo oompumbwe dhawo.



“Aanuulema oyendji mboka ya popi noshikundaneki shika oya ti osha li oshidhigu kuyo okuya pomahala gokuhogololela opo ya ka hogolole. Molwaashoka omatungo ogendji kage na iilondelo yuutemba waanuulema nenge mboka haya ende nuudhigu kootrapa,” New Era a kundaneke.



Olopota oya gwedha po wo kutya omahala gokuhogololela gamwe, obraille inayi tulilwa po aaposi.



Pomahala gamwe, aanuulema oya ti anuwa ootenda odha dhikwa pomahala ge na evugu nomamanya, shoka sha ningi oshidhigu okuundula okatemba.