Uupyakadhi mOmbala yAaHerero

MATHIAS HAUFIKU

Kapuuo tiihumbata nayi aniwa:

A kondjitha Kerina a fumbikwe momawendo gaaleli

Elongitho lyoshimaliwa shelelo shooN$90 000 miifuta yiikwaveta

Iiningi onga omuleli

A tula edhina lyelelo momananathano



OVENDUKA

Olopota ya ngongwapo kokomitiye tayi ithanwa Ovaherero Traditional Authority’s (OTA) transitional committee – ndjoka ya kuthako oshinakugwanithwa shiilonga melelo ndyoka, sha landula eso lyOmukwaniilwa gwawo, chief Vekuii Rukoro – otayi holola eeto pehulilo lyiilonga yomunashipundi gwelelo ndyoka, Vipuira Kapuuo.

Molopota yomomasiku 11 no 12 gaDesemba ndjoka ya monika koNamibian Sun oya holola iinima mbyoka ya ningwa kuKapuuo, yaaheli pamulandu gwelelo sha landula eso lyomukwaniilwa gwawo muJuni gwonuumvo. Olopota oya pewa elelo lyOvaherero Traditional Authority’s (OTA) pethimbo lyomutumba gwa ningilwa mOnderombapa moshikandjohogololo shaAminius ehuliloshiwike lya piti. Kapuuo ina kutha ombinga momutumba ngoka molwaashoka oku wete gwa ningwa kaashili paveta.

Oshiwike sha piti okwa pewa ekunkililo opo kaungaunge niikumungu yelelo ndyoka momukalo kehe.

Muyimwe yomwaambyoka ta tamanekelwa Kapuuo aniwa okwiiulike onga ta longo pehala lyomukwaniilwa yemwene, nonando okomitiye ndjoka oya tindi oompangela dhe muJuni.

Kapuuo ota lundilwa a li ta longele kumwe nofamili yanakusa, Mburumba Kerina opo a vule okufumbikwa momawendo gaaleli yAaHerero mOkahandja.

Okwa kondjitha opo Kerina a fumbikwe momawendo ngoka nonando elelo lyokomitiye ndjoka olya tindi.

Olopota ndjoka yomapandja 41 oya holola kutya ngele OTA oyali ya pitika Kerina opo a fumbikwe momawendo ngoka, nena otashi ka pa kehe gumwe ompito a pule opo a fumbikwe momawendo ngoka nomatompelo kutya okwa longa pamwe nomukwaniilwa.

Natango okomitiye oya holola kutya oya nongele aanapolotika yamwe ye na owino okufumbikwa momawendo ngoka pehala lyokufumbikwa kOmawendo gOmapendafule mOvenduka.

Kapuuo ota ku popiwa eetitha elongitho lyoshimaliwa sho OTA sha thika poN$90 000 shoka sha longithwa miifuta yopaveta sho elelo ndyoka lya ka konga ekwatho lyOmpangu yoPombanda mokukeelela efumbiko lyaKerina momawendo ngoka.

Ompango oya tokola kutya okomitiye ndjoka oyo owala yi na oonkondo okuninga omatokolo nokulonga pehala lyOmbara Otjitambi oshowo kutya omawendo ngoka oga nuninwa owala Ozombara Ovitambi.

Sha landula olopota ndjoka, omutumba ogwa holola kutya Katjiua okwa pumbwa okushangela Kapuuo omukanda opo a lombwelwe kutya elelo olya kanitha einekelo muye, onkene okwa tokolwa opo ka kuthe we ombinga miikumungu yelelo ndyoka, kakele miikumungu yelelo lyOvitoto hoka e li elenga.

Omatokolo ngoka oga tseyithilwa oshigwana mEtitatu lya piti momukanda gwiikundaneki ngoka gwa pitithwa kuamushanga omupe ngoka opo a hogololwa, Nandigisua Mazeingo.

Pahapu dhaMazeingo, okomitiye ndjoka oya tokola okuulika, Boas Tjingaete a longe pehala lyomukwaniilwa.

Okupitila moohahende dhe dhoPD Theron Associates, Kapuuo mEitatu okwa dhenge oompadhi pevi kutya natango oye ta longo pehala lyomukwaniilwa sigo uuna kwa hogololwa omuleli omupe kwiikwatelelwa komilandu dhelelo lyOTA.

Okwa holola kutya eulilo lyaChief Boas Tjingaete kali li paveta.

Omupresidende gwoRally for Democracy and Progress (RDP) Mike Kavekotora, momukanda ngoka a pititha okwa holola kutya euliko lyaKatjiua olyopapolotika.

Okwa pula aanapolotika ya hulithepo omahwahwameko momalelo gopamuthigululwakalo nokweethela opolotika kaanapolotika molwaashoka onkalo ndjoka otayi etitha etopokauko momalelo.

Okwa pula aaunganeki yomutumba ngoka ya kankame manga nokutala kutya etokolo ndyoka otali vulu okweetitha eyonagulo netopoko li thike peni mokati kelelo naalelwa.