Oshana kry nuwe kiesafdelings, nedersettings

Catherine Sasman – Nadat Ondangwa in die laaste afbakeningsproses in stedelike en landelike kiesafdelings gedeel is weens die vinnige bevolkingsgroei, is die Oshana-streekkantoor tans besig om kantore vir die kiesafdelings te bou.
Intussen word die twee distrikte steeds deur die munisipaliteit op Ondangwa as een gebied bestuur.
“Alle kantore in die onderskeie kiesdistrikte is langs groeipunte geplaas,” het die skakelbeampte van die streekskantoor, me. Hambeleleni Nyeemwatja, oor die ontwikkelinge in die streek gesê.
In 2010 was die bevolking in die Oshanastreek op 252 900 geskat. Oshana is die kleinste onder al die 14 streke en strek oor ’n oppervlak van net 8 653 vierkante kilometer.
Ongeveer 34 % van streek se bevolking is jonger as 15 jaar oud, en meer as 54,7 % is vroue. Dit beteken daar is 83 mans vir elke 100 vroue.
Teen 2011 was 22,2 % van die bevolking getroud, 3,9 % was in saamblyverhoudings en 2,1 % was in tradisionele huwelike.
Altesame 61,1 % van die bevolkingsgroep ouer as 15 jaar is “ekonomies aktief” in die landbou- en visserye sektor (25,3 %), 16, 3% werk in die dienssektor en 12,1 % bestaan uit beroepslui. Selfonderhoudende kommunale boere verskaf meer werksgeleenthede (30,5 %) as enige ander sektor in die streek.
Ondangwa het die grootste bevolkingsdigtheid in die streek, met 176,4 persone per vierkante meter.
Weens dié hoë syfer, het die Oshanastreekskantoor ingespring om erwe in nedersettings te ontwikkel en beoog om dorpsrade in die Eheke-nedersetting naby Ondangwa en die Uukwangula-nedersetting, ongeveer 5 km buite Oshakati, te bou.
Deur ’n proses van grondonteiening en vergoeding aan bestaansboere, is die streekskantoor van plan om 250 residensiële- en 28 besigheidserwe op Eheke te ontwikkel, en by Uukwangula word 386 residensiële- en 127 besigheids-erwe beplan.
Nyeemwatja het gesê erwe is reeds op Eheke gediens, hoewel vloedwaterstelsels nog geïnstalleer moet word.
Op Uukwangula is erwe reeds toegeken.
Nyeemwatja het gesê ’n unieke ontwikkeling vir Oshana is die oprigting van toilette in landelike gebiede, wat reeds sedert die 2013/14 finansiële jaar op die tafel was.
’n Reuse nuwe pakhuis vir noodtoestand-droogtehulp sal ook in die streek gebou word. Hierdie pakhuis sal vier noordelike streke – Oshana, Ohangwena, Omusati en Kunene – bedien.
’n Groot streekskantoor vir die ministerie van binnelandse sake en immigrasie is ook onlangs in Oshakati voltooi. Die ministerie van veiligheid en sekuriteit is ook van plan om ’n nuwe streekskantoor hier te bou.
Die ministerie van gesondheid en maatskaplike dienste is voorts ook besig om ’n psigiatriese eenheid by die Oshakati staatshospitaal in te rig wat alle pasiënte in die noordelike gebiede sal behandel.