Oonkundathana dhevi tadhi tsikile moshilongo

Oonkundathana kombinga yoshikumungu shevi moshilongo ndhoka dha ningwa moshitopolwa shaKhomas, nadho odha holola kutya ekutheko lyevi pwaahena iifuta osho owala tashi vulu okulonga nokukandulapo ompumbwe yevi mokati koshigwana.

Ekuthoko lyevi pwaahena iifuta nokushunitha evi ndyoka kooyene, omaiyuvo ga ningwa kaakalimo yomoshitopolwa shaKhomas mboka ya kala nokukutha ombinga momutumba ngoka gwa ningilwa mOvenduka oshiwike sha piti.

Omutumba guule womasiku gaali ngoka gwa hulu mEtitano lya piti, oguli oshitopolwa shoonkundathana dhopashigwana ndhoka tadhi ningwa, omolwa omutumba gwevi omutiyali gwopashigwana ngoka tagu ningwa moshilongo nuumvo momwedhi Kotomba.

Oyendji yomaakalimo mboka ya kutha ombinga momutumba ngoka gwa ningilwa moshinyanga shiigongi shaKovambo Nujoma Hall poombelewa dhelelo lyoshitopolwa, oya popile ekutho ko lyevi pwaahena iifuta yasha, lyo evi ndyoka li shunwe momake gooyene. Omaiyuvo ngoka oga popiwa woo kukansela gwoshikandjohogololo shaKatutura central, Ambrosius Kandjii, ngoka a popi kutya ota popi pehala lyoshigwana she.

“Ngoka ogo omaiyuvo ge li moshigwana. Kage shi omaiyuvo gaKandjii.

Aantu oya hala evi li kuthwe ko pwaahena iifuta.”

“Otwa pumbwa okutala komutumba gwomvula yo 1991 nokukonaakona kutya oshike twa ningi sha puka naashoka twa ningi shi li mondjila sho oshilongo twa tegelela shi ninge omutumba gwevi omutiyali,” ndyoka eyamukulo lya ningwa kuNgoloneya gwoshitopolwa shaKhomas, Laura McLeod-Katjirua, sho a pulwa kombinga yongushu yomitumba ndhoka.

Mayola gwaVenduka, Muesee Kazapua, ngoka naye a kala momutumba ngoka okwa popile omaiyuvo gaKandjii.

“Tse onga oKhomas otatu yi komutumba ngoka tatu popi kutya evi nali kuthweko pwaahena iifuta,” Kazapua a popi,omanga omutumba ngoka inagu ya pokafudho.



Aakondjelimanguluko

Omutumba ngoka ogwa popi woo kombinga yaakondjelimanguluko oshowo ehwahwameko lyoAffirmative Repositioning (AR, ndyoka lya popi kutya aakondjelimanguluko inaya ihumbatelwa momukalo gwashewa.

AR okwa popi kutya okwa simaneka oshilonga oshinene shoka aakondjelimanguluko ya longo mokumangulula oshilongo, ihe shoka inashi kala okatekete ko ku ya tula komeho yaaNamibia ayehe mokwiimonena uuwanawa.

Dimbulukeni Nauyoma gwoAR okwa popi kutya aakondjelimanguluko inaya shewa.

Okwa popi kutya ka pwali etsokumwe kutya ngele aantu ya galukile moshilongo nena otaya ka kala nokumona omauwanawa.

Okwa tsikile kutya shoka otashi e ta moshigwana omudhigululwakalo gwa nika oshiponga kutya kehe shimwe nashi pewe owala aakondjelimanguluko.

Nauyoma okwa holola woo omaiyuvo ge kutya otashi etitha ohenda sho oohapu kombinga yomutumba gwevi ngoka gwa tegelelwa guningwe moshilongo muKotomba itamu kundathwa aanyasha ngele tashi ya ombinga yuumwene wevi. Ta yambidhidha omapopyo gaNauyoma, Job Amupanda okwa popi kutya ha oonakukondjela emanguluko ayehe ya pumbwa okutulwa mongundu yaamboka taya pumbwa omayambidhidho moshilongo.

“Otwa hala okutya omukokoli presidende Sam Nujoma ota pumbwa omayambidhidho?

Otwa hala okutya aakondjelimaguluko ngaashi Dr Kawana naye okwa pumbwa omayambidhhdo, ondi na uupyakadhi naashoka,” Amupanda a popi, iikwatelela kefatululo lyaakondjelimanguluko mepangelo lyaNamibia.

Sho a popi pehala lyaakondjelimanguluko, Alex 'Poison' Kamwi gwoNamibia National Veterans Association okwa nyana omaiyuvo ngoka.

“Otamu popi kombinga yaakondjelimanguluko nokutokola kombinga yetu omanga katu po mpaka.

Olye e mu lombwele mu tokoloekombinga yetu? Inamu tu pa nokuli uuyelele kombinga yaashoka tamu popi pehala lyetu.”

Kamwi a popi iikwatelela kombinga yiipumbiwa yaamboka taya vulu okutalika mooprograma dhepangelo dhomatulululo.

“One oolye opo mu popye pehala lyetu?” Kamwi a pula.

Oonkundathana dholudhi ndoka otadhi ningwa moshilongo ashihe.

NAMPA