Omuulikwa gwaSwapo mOmbaye inaya yambidhidhwa kelelo lyongundu

Nonando eyambidhidho lyaSwapo mondoolopa yaMbaye moshitopolwa shErongo, otali shongola, kape na gumwe gwomaakomeho yopombanda ya ne mongundu yoSwapo a kala piigongi yomahwahwameko omolwa omahogololo guukansela moWalvis Bay Urban ngoka taga ningwa ngula.

Sirie Topulathana otashi ulike a fa iikalekelwa omolwa ekwatathano lye nongundu yoTeam, ongundu ndjoka ya dhengwamo momahogololo guuleli wongundu yoSwapo kongundu yoTeam Harambee 2017.

Aanongononi yonkalo yopapolotika, oya holola kutya pakwiikalekela Topulathana, aaleli yongundu oya kanitha ompito yokuhwahwameka uukumwe mongundu.

Omuulikwa gwoSwapo okwa taalela olugodhi pokati kaakuthimbinga yalwe yatatu, yaali aahogololwa yiithikamena omanga omutitatu omuulikwa gwongundu yoPopular Democratic Movement (PDM).

AakwaSwapo yamwe oya popi kutya okwa kala nale omananathano mokuulika omuhogololwa gwoSwapo momahogololo ngoka sho Topulathana a li a gama ombingakoTeam Swapo.

Sho eyambidhidho lyaSwapo mOmbaye li li koongodhi, ope na omaiyuvo kutya aaleli ngaashi Omupresidende gwoHage Geingob, omupeha presidende, Netumbo Nandi Ndaitwah, omushangaindjai, Sophia Shaningwa oshowo omupeha amushanga, Marco Hausiku – oya li ye na okukala taya gandja kaahogololwa yomiikandjohogololo oompangela dhongundu.

Ekanitho lyeyambidhidho lyaSwapo mOmbaye otali kwatakanithwa nekanitho lyiilonga omayovi mokati kaalongi yomomeya, sha landula ekuthoko lyookota dhokukwwata oohi komahangano gamwe po gopaumwene nokudhigandja komahangano gamwepo mepingakanitho lyiifuta yoombumbo.

Ominista nale yoohi, Bernhardt Esau ngashiingeyi oyi li mondjeedhililo opamwe nominista nale yuuyuki Sacky Shanghala naalumentu yalwe yane mboka taku popiwa kutya oya kutha ombinga melyenge ndyoka lyoombumbo.

Aalongimomeya nale mboka oye wete kutya ongundu naaleli mepangelo oye ya nupo.

Omanga yamwe ye wete kutya aaleli yongundu oyiikalekele Topulathana yamwe oya holola kutya ongundu oya kanitha omukumo mondoolopa moka.

Omunongononi gwonkalo yopolotika, Ndumba Kamwanyah okwa holola omaiyuvo ge kutya, oshinima oshinene oshooka kutya inaya hala okutuma omuntu ngoka aantu ya geela nokweetitha ompito yokutidhwa. Okwa tsikile kutya onkalo yaSwapo mondoolopa moka otayi nana nuudhigu naashoka otashi vulika ya longitha omukokoli presidende onga omukalo gwokupula edhiminepo.

Okwa gwedha po kutya ngele nena Swapo ina sindanapo omahogololo ngoka, nena shoka otashi etitha omaipulo kombinga yesimano lyaNujoma.

“Tutye kutya ngele omuhogololwa iithikamena okwa sindana nena esimano lyaNujoma oli li moshiponga na otashi ka tya oshindji kombinga yuuthiga waSwapo.”

Nujoma pamwe nomona Utoni oyo owala ya popitha iigongi yomahwahwameko gaTopulathana.Oonzo dhimwe dhongundu yoSwapo, odha holola kutya Topulathana ke na eyambidhidho okuza pombanda yongundu.

Oku wetike kutya onkalo ndjoka kayi li owala mOmbaye ihe nomoshikandjohogololo shaKhomasdal woo. Amushanga gwomauyelele mongundu yoSwapo, Hilma Nicanor okwa pataneke omaiyuvo ngoka, ta gwedha po woo kutya kape na etopoko mongundu yawo pokati koTeam Harambee noTeam Swapo.

Pethimbo lyoshigongi shomahwahwameko shoka sha ningwa kuNujoma mOmbaye Olyomakaya ga piti, okwa popi kutya onsteyo yaTopulathana mEwawa lyAanyasha mOngundu yoSwapo oshowo Ewawa lyAakiintu mongundu ndjoka mondoolopa yaMbaye oya ningitha a kale omuulikwa gwomondjila a ninge kansela gwoshikandjohogololo shoka.

Nujoma okwa popi nokulombwela mboka ya kala poshigongi shoka pokapale kaKuisebmund kutya Topulathana okwa kala uule woomvula 12, ta kutha ombinga miinyangadhalwa yaSwapo, mwakwatelwa okukala amushanga gwomauyelele moshitayi shaGetrude Kandanga moshikandjohogololo shaWalvis Bay Urban. Okwa li woo omudhiginini gwiiniwe gwEwawa lyAanyasha moshitayi osho tuu shoka oshowo oshilyo shoSwapo's urban district executive committee.

Nujoma okwa popi kutya ongundu yoSwapo moshitopolwa shErongo oyiikolelela noonkondo muTopulathana unene mehwahwameko lyopapolotika.

Nujoma okwa tsikile kutya Topulathana okuuviteko oompumbwe dhaakalimo yomOmbaye, unene aanyasha sho naye e li omunyasha.

Topulathana okwa pandula elelo lyongundu yoSwapo sho lye muulike a ninge omuhogololwa gwongundu momahogololo ngoka guukansela.