Omukwashigwana gwaAmerika ta futitha epangelo oomiliyona 1.1

Omukwashigwana gwaAmerika ngoka ta pangulilwa oshipotha shedhipago moNamibia, Marcus Thomas ota futitha ominista yoshikondo shopolisi, komufala ndjai gwoondholongo moNamibia oshowo aanambelewa aatonateli yoodholongo yane.

Thomas, ngoka ta pangulwa pamwe nomukwashigwana gwaAmerika omukwawo Kevan Donell Townsend mboka taya tamanekelwa oshipotha shedhipago lyomukwashigwana gwaNamibia, Andre Heckmair ngoka dhipagelwa mOvenduka momvula yo 2011, ota pula opo a futwe oshimaliwa sha thika poN$500 000 omolwa okudhengwa nokweehamekwa kolutu, N$200 000 omolwa uupyakadhi wopamadhilaadhilo mboka eetelwa konkalo ndjoka, oshowo oshimaliwa shooN$400 000 omolwa eningilo lyomuyonena ndhoka. Okwa hokolola kutya okwa dhengwa nokumonithwa iihuna sha ningilwa mondholongo yaVenduka.

Pahokololo lye, aniwa oya li ya yi molugodhi nomunadholongo omukwawo momasiku 13 gaJanuari omvula ya piti, na okwa li a kuthwamo mokati kayakwawo nokwiikalekelwa omanga ina shunwa mondunda moka ha kala moshitopolwa E.

Okwa tsikile kutya okwa li iithanwa mo moshitopolwa moka hakala nokufalwa kombelewa Silas Matheus, ngoka e li omunambelewa gwodholongo. Matheus okwa li pamwe naEsra 'Swapo' Kaisitungu, Josiah, Siambanga oshowo omunambelewa gumwe a tseyika nedhina Shimbome.

Thomas okwa tsikile kutya okwa ithanwa opo a ka yelithe kutya oshike sha etitha olugodhi ndoka, ihe Matheus ina taambako eyelitho lye.

“Pamaiyuvo ge, ondi na uupyakadhi naAafrika ayehe,” Thomas a popi.

Matheus aniwa okwa gandja elombwelo kaatonateli yodholongo ya etemo omunadholongo omukwawo Reinhardt Itembu, ngoka a li a pulwa a dhenge Thomas ihe okwa li a tindi.

Thomas okwa tsikile kutya okwa li a lombwela a kuutumbe pevi na okwa dhengwa kaanambelewa.

Okwa popi kutya okwaako ke kokokulyo okwa li kwa zinda na okwa ningi omasiku a patelwa mondunda oye awike.

Okwa tsikile kutya lwanima okwali a pangwa komupangi mokaklinika kondholongo na okwa li wo a falwa kaanambelewa yoNampol Special Field Force moshipangelo shaKatutura, nokushunwa mondjeedhililo moka a kala iitulilwa.

Matheus aniwa okwa gandja elombwelo opo Thomas ka talelwe po nenge a pitikwe a dhenge ongodhi. Thomas okwa popi kutya Manfred Tatamunua oshowo Innocent Mukabi ya za moombelewa onene dhoongolongo oya li ye mu ningile omapulaapulo kombinga yoshikumungu shoka.

Okwa popi kutya okwa tulilemo Matheus oshipotha shonkambadhala yedhipago oshowo edhengo, shoka a tulamo mopolisi yaKatutura muMaalitsa gwo2017.

Komufala ndjai gwoodholongo okwa ningi omutumba gwomapulaapulo moshikumungu shomaihumbato gaMatheus na okwe mu tulilemo oshipotha shedhengo oshowo momaihumato ge ngoka taga nyanitha edhina lyoshikondo shoka, pahokololo lyaThomas.

Okwa kolekwa oshiwike sha piti kutya eindilo lyaThomas pamwe naTownsend opo omupanguli mompangu yopombanda , Christie Liebenberg iikuthe mo moshipotha shawo olya tindwa. Mboka oya popi kutya kaye na ondjo moshipotha shoka shedhipago taya tamanekelwa, omuyeka kwahomatiwa, eeto lyiilwitho kayi na oombaapila moNamibia oshowo okukala nondjembo oshowo ooholo kadhi na oombaapila nonkambadhala okuya moshipala iilonga yoshikondo shuuyuki.

Iipotha ayihe mbyoka otayi kwatakanithwa nedhipago lyomunamimvo 25, Heckmair, ngoka a yahwa omanga a li mehauto lye mepandanda lyaKlein Windhoek momasiku ga 7 gaJanuari mo 2011.

FRED GOEIEMAN