NUNW a hala uumwene woopresenda 50 moomina

OGONE TLHAGE

OVENDUKA



Ehangano lyoNational Union of Namibian Workers (NUNW) olya popi kutya oshilongo oshi na iimaliwa ya gwana tayi vulu okulanda ko uumwene woomina wakalela po oopresenda 50.

Amushanga gwehangano ndyoka, Job Muniaro, okwa popi kutya oshilongo oshi na eliko tali vulu okukutha ko uumwene mboka.

Sho a pulwa kombinga yomikundu dhopashimaliwa ngele tashi ya komamino, Muniaro okwa popi kutya kape na omukundu kuNamibia ta kuthako uumwene woonzo dhe.

Muniaro okwa popi ngaaka sha landula sho oshikondo shiikwamina sha thiminikwa konkalo yetukuko lyocorona opo shi shunithe pevi iilonga, omanga omina yoSkorpion Zinc moRosh Pinah ya tseyitha kutya otayi thiminikwa yi pate.

Omapopyo ge oga kolekwa komupeha amushanga gwongongahangano yoomina, Paulus Situmba, ngoka a popi kutya okwa pumbiwa shili okulandwako uumwene woomina, ta gwedha po kutya itaya hulitha okupopya nokuhwahwameka oshinima shoka. Okwa popi kutya pethimbo ndika lyocorona, aagandji yiilonga oyo owala ye wete yagumwa noonkondo konkalo. Situmba okwa popi kutya ethimbo ndika otali gandja ompito kaantu ya kale muukumwe.

Omunambelewa omukuluntu gwoChamber of Mines of Namibia, Veston Malango okwa popi kutya kashi li mondjila ya tye sha na okwa ukitha omapulo goNamibian Sun kuuministeli wiikwamina.