Geingob a nyana omahangano gomoshilongo niikundaneki

Omupresidende Hage Geingob okwa nyana omahangano gomatungo moshilongo ngoka taga thipi epangelo ombinzi.
Geingob okwa ningi omanyano ngoka pethimbo a tula miilonga ombaanga yiikulya oshiwike sha piti . Omuleli okwa yelitha kutya omolwashike ya tokola okukaleka etungo lyoompungululo dhiikulya yombaaanga ndjoka, ombaanga ya nuninwa okugandja omayambidhidho giikulya kaakwanaluhepo moshilongo.
Geingob okwa popi kutya konima sho ya mono omusholondondo gwoondando omolwa etungo lyoompungulilo dhoka, epangelo olya tokola kutya itali pula komeho netungo lyoompungulilo dhoomiliyona 100 omanga aakwashigwana taya ka lala nondjala.
“Otashi ulike woo nkene aanangeshefa yomoshilongo ya sa ondjala. Shampa owala ya uvu kutya ope na otendela yepangelo nena otaya tameke nale okutula ayihe pomahala noondando dhawo otaye dhi londeke noonkondo,” Geingob ta ti. Omupresidende okwa popi woo kombinga yaaatoolinkundana mboka ihaya mono sha oshiwanawa sha longwa kepangelo lye. Okwa pula kutya omolwashike aatoolinkundana yomoshilongo ihaya shanga omahokololo omawanawa giilonga iiwanawa mbyoka ya longwa kepangelo lye, ngaashi sha hwahwamekwa koshinyolwa komutseyinanwa gweliko gwAmerika Joseph Stiglitz oshowo omutseyinawa gwiikundaneki Anya Schiffrina. Pahapu dhaGeingob aantu yamwe oya kondema iilonga yaStiglitz na Schiffrin na oya popi kutya iilonga yawo oya hwahwamekwa kepangelo.
Omapopyo gaGeingob oga landula ombapila yeeguluka ndjoka ya shainwa kuD Aluteni na R Kozonguizi na oya nyanyangithwa mushimwe shomiikundaneki yomoshilongo. Mombaapila ndjoka oya holola kutya inaya vula okutothamo uulingilingi niilonga tayi longwa kaaiyambapaleki moNamibia. Ombapila ndjoka oya popi kutya iipangelo yepangelo otayi gu po na kayi na omiti omolwa iimaliwa tayi tetulwa mbyoka tayi pewa oshikondo shuundjolowele.

JEMIMA BEUKES