Epangelo lya tondoka onkugo yoskola yaAmarika

Sha landula oolopota kombinga yaSaara Lukas na ya kwawo yalwe mboka ya tokola okushuna koskola nokutsikila elongo lyawo lyopevi omanga yeli mepipi lyoomvula omilongambali nasha, epangelo olya tondoka onkugo yoskola yopevi yAmarika.

Etungo lyomagumbo gaalongi olya manithwa nale omanga etungo lyoongulu dhoskola dha gwedhwa po dhili ne oshowo omuhandjo gwoskola oya tamekwa okutungwa.

Pahapu dhomukuluntuskola Abraham Haukelo, okwa popi kutya okwa nyanyukwa noonkondo sho epangelo lya tokola okuyambula po oskola yaw o nokuyi gwedhela sigo opondondo onti-8.

Okwa popi kutya muule woomvula ndatu dha piti, oskola oya kala owala nondondo sigo 4 na osha kala oshidhigu kaanaskola oku ka tsikila eilongo lyawo.

“Onda nyanyukwa noonkondo molwaashoka aanona yomuAmarika ota ya ka tyapula elongo lyawo. Osha li hashi uvithandje nayi noonkondo sho aanona aashona taya dhigipo oskola uuna ya yi mondondo onti-4 molwaashoka kaya li ye na nkene,” Haukelo ta ti.

Okwa pandula woo olopota kombinga yaSaara Lukas na ya kwawo yatano mboka ya tokola okushuna koskola.

“Konima sho aavali ya mono aanyasha mbaka miikundaneki kutya kape na ngoka a kala a hala aanona ye ya kale megumbo o yali ye ya tumu koskola opo ya kale ya fa aakadhona aakwawo. Aakadhona mbaka oyeli ta ye shi enditha nawa moskola na oye na omikalo, naashika oshi li etsomukumo ewanawa.”



Omukuluntuskola okwa popi kutya omvula ya ziko, oya li owala ye na aanona 56 ihe nuumvo omwaalu ogwa londa sigo opaanona 106.



Ondjokonona yoskola

Oyali ya totwa po moomvula dho1960 kongeleka yaELCIN, Oskola yaAmarika momukunda oAmarika oshowo oskola yaDr Ndeutala Angolo Primary School mOnghaanghaa odho owala ooskola tadhi adhika momudhingoloko na odhina owala ondondo yotango sigo ontine.

Sha landula etalelepo lyomupevi minista mombelewa yomupevi presidende , ngoka e na oshinakugwanithwa shesiloshimpwiyu lyaantu yomihoko ndhoka dha kala inadhi talika nale monakuziwa, Royal /Ui/o/oo, ngoka a talele po oskola ndjoka muJuli gwomvula ya piti, osha tokolwa opo oskola ndjika yi kale nondondo sigo onti-8 nuumvo.

Omuprima Saara kuugongela-Amadhila na ye okwa li a talele opo oskola ndjika naashika osha li sha thiminike Lukas na yakwawo yahamano; Ottillie Johannes, 20, Lyidia Ipinge, 19, Josephina Gabriel naOttillie Jonas, yoomvula 17, oshowo Leena Kashenye, 16 ya shune koskola.

Aakadhona mbaka oya kala pomagumbo molwaashoka ka ye na mpoka ta ya ka tsikila oskola, oshoka osikola yopopepi na yo yedhina Erastus Shapumba Junior Secondary School oyi li mEtilyasa, konyala oshinano shookilometa 80 okuza mpoka na yo kayina omuhandjo.





Omvula ya ziko, oshikondo shomathaneko gomahumithokomeho gaakwashigwana mboka ya kala yathigalapo, mOmbelewa yomupevi- osha tokola okuyambidhidha aakadhona mbaka noshimaliwa shooN$500 kehe komwedhi opo ya vule okwiikwatha. Pahapu dhOmukuluntu gwElongo mOmusati Laban Shapange, ota dhi ti, egwedhelo lyoongundu poskola mpoka oshinima oshiwanawa molwaashoka aanona otaya ka tyapula uuthemba wawo wokumona elongo. Mwene gwomukunda Amarika Salom Hamutenya okwa popi kutya etungo ndyoka tali ningwa poskola mpoka otali e ta eyambulepo momukunda gwe.

ILENI NANDJATO