Almal kry ‘n kans

Michelline Nawatises

Train Occasion is ’n laerskool wat voorsiening maak vir kinders met verskillende spesiale behoeftes soos spraakprobleme, disleksie, dispraksie, outisme, aandagafleibaarheid en ander leerprobleme.

Dit is in Januarie 2012 gestig deur me. Jenny Korstel, wat van toe tot April 2017 die skoolhoof was. Sy moes na Duitsland terugkeer en sedertdien is me, Antonetor Paxma Midzi, aan die stuur. Midzi is bykans 20 jaar in die onderwys betrokke.

Korstel is steeds 'n aktiewe lid van die skoolbeheerraad en verantwoordelik vir die werwing van vrywillige onderwysers en terapeute uit Europa vir die skool. Die meeste kom van Duitsland, Frankryk en Switserland.

Train Occasion bied internskappe aan finalejaarstudente wat spesialiseer in onderrig vir leerlinge met spesiale behoeftes. Die internskappe word vrywillig gedoen omdat die skool dit nie kan bekostig om dié spesialiste ‘n vaste salaris te gee nie.

Korstel gaan na oorsese universiteite en instansies en bemark dié vrywilligersprojek. Die skool huisves gemiddeld drie vrywilligers op 'n slag wat vir drie tot ses maande klasse vir kinders in die kleuterskool tot in graad sewe gee.

Die leerlinge kom uit verskillende dele van die samelewing, maar meestal uit minderbevoorregte huishoudings. Die skool maak baie staat op skenkings, waarvan die meeste van Europa kom.

Train Occasion sou graag steun van plaaslike ondernemings en individue wou geniet. “Ons kan nie altyd afhanklik wees van die vrygewigheid van vriende in Duitsland nie. Ons is 'n privaat skool en ontvang tans geen geld van die regering nie,” het Midzi gesê.

Die deurlopende interaksie met vrywilligers uit verskillende wêrelddele het ‘n uitstekende invloed op die kinders omdat dit hulle gedagtes prikkel en meer van ander kulture leer.

Train Occasion-laerskool se uiteindelike doelwit is om geskikte ondersteuning aan kinders te verleen deur hul individuele behoeftes te bevredig, en hulle met behoorlike opleiding voor te berei om na hoofstroomskole terug te keer.

Interessante skoolgeleenthede

• Besoek aan die arkade met die jonger kinders (September)

• Jaarlikse drie dag lange spanbousessie op Okondjima (Oktober)

• Train Occasion se optog vir bewusmaking oor outisme en spesiale behoeftes (Oktober)

• Jaareindkonsert en prysuitdeling (November)

Die naam van die skool beteken dat leerlinge die geleentheid kry om hul volle potensiaal te ontwikkel teen hul eie pas en volgens hul individuele behoeftes.

Die skool het ongeveer 25 leerlinge wat baie aandag vereis wat betref ondersteuning om hul akademiese loopbane te voltooi. “Ons personeel bestaan ??uit vyf voltydse onderwysers wat almal voldoende toegerus is en in die veld van spesiale behoeftes studeer, veral kinders met outisme,” het Midzi gesê.

Clifford de Klerk, ’n graad 7-leerling, het met groot opgewondenheid vertel van sy goeie jaar: “Ek kon myself ten volle voorberei vir die volgende jaar in 'n nuwe skool. Ek is in graad sewe en gaan volgende jaar na graad agt aanbeweeg.

Volgens hom is die moeilikste deel van die skool verlaat is om met kinders van elders te meng. “Sommige kinders het soms lelike opinies oor ons. Maar ek blameer hulle nie, want hulle verstaan nie regtig dat ons op ’n ander manier leer nie.”