Aayelele yahala evi lyawo

Aakwashigwana mboka oya popi kutya oya loloka okukala taya ihumbatelwa ya fa aazaaizai kaye na omadhilaadhilo oshowo omukalo gwepangelo gokuulika aantu yomihoko dhilwe oyo ya ungeunge niikumungu ye ya pamba.

Oya popi kutya kaye na ohokwe miinima yilwe ngaahi omagadhi gokugwaya goVaseline, uunamunate wocoke oshowo uumboloto mbyoka haya pewa ihe yo yahala uuthemba kombinga yevi lyawo lyuuthiga. Elenga enene Ananias Soroseb lyoKai !Akhoen Hai/Om ngoka e li omutekulu gwelenga Fritz Aribeb #Arebeb, ngoka a dhipagwa kaaNdowishi momvula yo 1904 popepi nOkorusu, okwa pula kutya omolwashike aakwashigwana yomuhoko ngoka ihaya ihumbatewa ngaashi omihoko dhimwe. Okwa popi kutya elenga Johan Kxao /Ui/o/oo, ngoka e li omupeha minista gwaakwashigwana mboka ya kala inaya talika nale mombelelwa yOmupeha Presidende okwa kala nokwiidhimbika omakemo gawo na ina tsakanena na yo konima nkene a yi mombelewa.

“Otwe mu shangela oombaapila naasho twa thiki mOvenduka opo tu tsakanene naye inatu mu mona. Ota hwahwameke owala uuwanawa wAaherero oshowo aapopi yeleka lyoTsumkwe Ju|'hoan, ke na ohokwe natse na otu na okwiikondjela tse yene.” Okwa popi kutya natango kashi li mondjila ngele epangelo li na iikondo ya nuninwa okuungaunga nomaupyakadhi ga taalela aakwashigwana yomuhoko gwontumba, ihe iikondo mbyoka otayi kwatelwa komeho kaanambelewa ya za komihoko dhilwe. “Aantu mboka ihaya tala komaupyakadhi getu na otaya gandja owala omayambidhidho kaantu yomihoko dhawo. Ooprograma dhoondya oshowo dhomailongo otadhi pewa aantu yalwe omanga tse Aayelele tatu si ondjala.” Elenga Josef Gomoseb, olya popi kutya aakwashigwana Aayelele mboka haya longo moofaalama ihaya mono oondya dhoshikukuta.

Okwa popi kutya aagandji yiilonga ohaye ya fala opo ya kashangithwe ya kale taya kwata nokupewa oondya dhoshikukuta, ihe konima ngele ya shuna koofaalama nena ohaya ka kala taya metelwa uusila mboka.

JEMIMA BEUKES