Aantu yahetatu ya si omeya mehuliloshiwike lya piti

Omunambelewa omupopiloko gwOpolisi yaNamibia, Omupeha kOmufala, Kauna Shikwambi okwa popi kutya aantu yahetatu oya si omeya moshitopolwa shaHangwena oshowo Omusati, moka mwa lopotwa efundja.

“Iiningwanima mbyoka oya kwatelamo aanona naakuluntu, naangoka omukuluntu oku na oomvula 79 omanga omushona e na oomvula mbali, onkene otatu kunkilile oshigwana shi kale sha tonata uuna tashi taaguluka omeya nenge yeli pomahala pe na omeya.”

Shikwambi okwa pula oshigwana kashi taaguluke omeya koompadhi nenge niihauto omanga inaya tala kutya ondjele yomeya oyi li ngiini.

“Inaya dhina ondjele yomeya molwaashoka omeya ohaga dhipaga. Otaya pulwa ya longithe oondjila dhilwe pehala lyokuya moshiponga nokweetitha omaso. Otatu kunkilile aakuluntu ya indike aanona ka ya yoge momeya nenge ya taaguluke omeya oyo ayeke.”

Mosoondaha momukunda Okanwa, moshitopolwa shaMusati, olutu lwaApniel Gustav gwoomvula mbali olwa adhika momuthima. Itaku fekelwa uulingilingi. Moshiningwanima shimwe mOsoondaha momukunda Okatope momudhingoloko gwa Omuntele olutu lwomunamimvo 34, olwa adhika mondama yomeya. Otaku hokololwa kutya nakusa okwa zi megumbo ethimbo lyongula na ina galuka. Okwa tamekithwa olukongo lwe nolutu lwe olwa monika.

Moshiningwanima shilwe, momukunda Oshikango olutu lwomunamimvo 37, Natangwe Nghishitongo olwa adhika moshilambo shomeya shi li popepi negumbo lye.

Momukunda Omangolowani moshitopolwa shaMusati, olutu lwomukiintu omukwashigwana gwaAngola, Moshivasha Shambanga, olwa adhika lwa kangala kombanda yomeya mokanala mOsoondaha.

Shambanga okwa monika lwa hugunina momasiku 29 gaFebruali momudhingoloko gwaKatamba moAngola lwopotundi onti 18:00. Otaku fekelwa kutya oshiningwanima shoka osha ningilwa moAngola, nolutu lwe olwa faalelwa komeya.

Molyomakaya momukunda Onekwaya West mOngha, olutu lwomunamivo 79, Sakeus Sem Kashimbode olwa adhika mondama yuudha omeya.

Nakusa okwa monika hugunina momasiku 28 gaFebruari. Naasho kwa ningwa olukongo olutu lwe olwa adhika momeya.

Momukunda Omatwadiva moshitopolwa shaMusati, olutu lwomunamimvo 39, Magadalena Daniel olwa adhika kombanda yomeya mondunda ye yiipeleki megumbo lye. Metitano momukunda Oyongo mEdundja, olutu lwomunamimvo hamano Julia Ndapewa Junias olwa adhika momeya melambo li li popepi negumbo lyofamili lye.

Okwa popiwa kutya okwa lopotwa a kana konima sho a ndopa okuthika kegumbo okuza koskola. Oongaku dhe odha adhika popepi nelambo ndyoka. Momudhingoloko gwaKongo momukunda Onhuli, omunamimvo 13 Rauna Shiwoudula Gabriel okwa sile mehemele lyomeya mOsoondaha. Palopota yopolisi, nakusa ngoka e li ta lumbu nuulema okwa thigwa megumbo oye awike kumeme gwe omanga ta litha iimuna mepya. Sho a galuka okwa adha omonakadhona a hulitha.

Kiiponga yomoondjila, okwa lopotwa omunamimvo 39, Josef Petrus a hulitha moHenties Bay mOlyomakaya konima sho ohauto ndjoka a li ta hingi ya zi kopate nokwiidhenga mekuma lyegumbo. Petrus ngoka a li mehauto oye awike okwa umbwamo mehauto nokusila pehala lyoshiponga.

Metitano mondjila yOutjo-Otjiwarongo omuhingi gwohauto yotuukala yoMazda okwa kanitha okondolola yoshiyenditho. Aantu yatatu oya hulithila moshiponga shoka.

Aantu yaali oya hulithile pehala lyoshipoga omanga omutitatu a hulithile moshipangelo. Oonakusa oya tumbulwa komadhina kutya Weldrud Hoses (20), Tsibeb Christian (47) oshowo Bernadette Sannies (47). Aantu yalwe yaali oya ehamekelwa moshiponga na oye li moshipangelo.

Shikwambi okwa popi kutya iiponga mbyoka oyili oshizemo shoondjila dha tuta.

Okwa pula aaniihauto ya hinge nawa kashona nokukala ya tema omalamba gawo, ta gwedha po kutya ondapo yookilometa 60 mowili mondoolopa oshowo 120 mondjila ihayi longithwa uuna onkalo yoondjila ya lunduluka.



ELLANIE SMIT