Aantu yahamano oya si komanyutu mOmusati

Aakokele yatatu okwa lopotwa nayo ya hulitha komanyutu moshitopolwa shoka omanga omagumbo omayovi moshitopolwa kage na oondya nenge oondya dhi na iitungilutu ya gwana po, nonando ongaaka ngoloneya gwoshitopolwa shaMusati, Erginus Endjala ke na ontseyo muuyelele mboka.

Olopota ya ngongwa po kombelewa yomukomeho guundjolowele moshitopolwa shoka sha landula omapulaapulo ngoka ga ningwa koNamibian Sun, oya holola kutya uuyelele wa gandjwa okuzilila moshitopolwa pokati komwedhi Januari oshowo Sepetemba nuumvo, aanona ye Ii po 397 oye na uupyakadhi womithika itadhi tsu kumwe noomvula omolwa ompumbwe yiitungilutu, omanga 808 oye na uupyakadhi wiiviha yi li pevi noonkondo omanga 360 ye na iiviha itayi tsu kumwe nomithika omolwa uupyakadhi wompumbwe yiitungilutu.

Nonando ongaaka olopota ndjoka inayi hololelwa oshigwana pethimbo kwa dhimbulukiwa esiku lyOondya mUuyuni omwedhi gwa piti, ndyoka lya dhimbulukilwa moshitopolwa shaMusati, lya longekidhwa kehangano lyoFood and Agriculture Organisation of the United Nation (FAO). Endjala natango okwa popi kutya Omuprima Saara Kuugongelwa-Amadhila okwa ningi omutumba noshikondo shuundjolowele moshitopolwa shoka oshiwike sha piti ihe ina pewa olopota ndjoka.

Omolwa oshikukuta omagumbo ogendji moshitopolwa ogiikolelela koondya dhoshikukuta ndhoka hadhi topolwa kepangelo okupitila melelo lyoshitopolwa ihe aakwashigwana otaya popi kutya oondya dhoka inadhi gwana.

Iipotha yi li pombanda yomanyutu oya lopotwa miipangelo iinene moshitopolwa shoka ngaashi oshipangelo shaKahao, Tsandi, Outapi nOshikuku.

Oshikuku osha lopota omwaalu guli pombanda gwiipotha 796, Okahao 285, Outapi 258 omanga Tsandi ya lopota iipotha 226 yomanyutu.

Iipotha yuupyakadhi womuthika itadhi tsu kumwe noomvula yi li 217 oya lopotwa mOshikuku oshowo iipotha 429 yiiviha yi li pevi niipotha 150 yiiviha itayi tsukumwe nomithika.

Iipotha 79 yomithika itadhi tsu kumwe noomvula oya lopotwa mOkahao, iipotha 140 yiiviha yi li pevi oshowo iipotha 66 yiiviha itayi tsukumwe nomithika.

Outapi omwa lopotwa iipotha 38 yomithika itadhi tsu kumwe noomvula, 133 iipotha yiiviha yi li pevi oshowo iipotha 87 yiiviha itayi tsukumwe nomithika omanga moTsandi mwa lopotwa iipotha 63 yomithika itadhi tsukumwe noomvula, iipotha 106 yiiviha yi li pevi oshowo iipotha 57 yiiviha itayi tsukumwe nomithika.

Aakokele yatatu oya lopotwa ya si komanyutu moshitopolwa shoka, sho omunamimvo 67 a hulitha mOkahao omanga aakokele yaali yoomvula 87 ya hulitha mOutapi, yalwe yaali oya lalekwa mo moshipangelo.

Omukomeho guundjolowele moshitopolwa, Alfons Amoomo okwa popi kutya oshilonga shuuminista okukondjitha omanyutu mokati koshigwana.

Aasilishisho yaanona naavali otaya indilwa ya fale aanona komandiki guundjolowele ngoka geli popepi opo ya vule okuningilwa omakonaakono kombinga yonkalo yomalutu gawo ngele tashi ya kiitungilutu, pahapu dhaAmoomo. Okwa pula woo omahala gokukala ga kale ga yogoka aluhe opo ku yandwe omaupyakadhi ngoka haga hwahwameke omanyutu.

Ngoloneya Endjala okwa popi kutya oku na owala ontseyo kombinga yaanona mboka ya si komanyutu moAmarika nake na we uuyelele wulwe.

Okwa tsikile kutya pethimbo lyomutumba ngoka gwa ningwa nomuprima oshiwike sha piti, aanambelewa oya gandja owala uuyelele waanona mboka yatatu, na ke shi kutya omolwashike ya holeke uuyelele mboka tawu popiwa koNamibian Sun.

Omunakimvo 64, Uveninawa Petrus a za momukunda Amarika okwa popi kutya oku na egumbo li na aantu yaheyali na ayehe oyiikolelela owala moondya dhoshikukuta okuza kepangelo, ihe inadhi gwana.

Okwa popi kutya aanona mboka haya yi koskola ohaya kwashilipaleke kutya oya ya kootundi kehe esiku opo ya ka vule okulya koskola okupitila moprograma yokugandja iikulya kaanaskola.

Okwa tsikile kutya omayambidhidho giimaliwa okuza kepangelo ngoka haga pewa aanona oshowo openzela ye ayihe ohayi pwile muusila oshowo iifuta yolefa okuza kondoolopa yaKahao kehe omwedhi.

Endjala okwa popi kutya ke na uuyelele ngele iikulya mbyoka hayi gandjwa yoshikukuta oya gwana nenge inayi gwana.

ILENI NANDJATO