Aahololimadhilaadhilo naatoolinkundana ya tulwa miipandeko

JUSTICIA SHIPENA OSHOWO

ELLANIE SMIT

OVENDUKA



Aantu ye li po 26 mwa kwatelwa aatoolinkundana yatatu oya tulwa miipandeko mOlyomakaya nopolisi oya popi kutya oya yi pondje omilandu dhi na sha nekondjitho lyombuto yoCovid-19.

Aahololimadhilaadhilo mboka oya yi mehala lyoongeshefa lyoWernhil Park, opo ya edhile ehala ndyoka nokugandja etumwalaka koshikondo shongeshefa kutya oshi na oshinakugwanithwa okukondjitha omiyonena niimbuluma yopaukashike kookantu.

Mayola-ndjai, Oscar Embubulu okwa popi kutya aahololimadhilaaadhilo mboka kaye li paveta, ta popi kutya opolisi oya ka ye ya tala onteni okuza nkene ya tameke mEtine lyoshiwike sha piti, na oya pula mboka taya kutha ombinga ya landule oompango.

Okwa popi kutya opolisi itayi kiidhidhimikila etaaguluko lyoompango na otayi ka ungaunga naamboka taye shi ningi. Okwa popi kutya lwopotundi onti 10:30 mOlyomakaya, ongundu yaantu ya thika po 300 oya tameke tayi gongala po Zoo Park mOvenduka opo ya ninge ehololomadhilaadhilo komukalo ngoka epangelo nopolisi tayi ungaunga nomiyonena dhopaukashike kookantu moshilongo.

“Sho ongundu ndjoka ya ningi onene oya tameke taya ningi omunyanyo yuuka koWernhil Park shopping mall omanga taya igidha nokuya moshipala omalweendo pondingandinga yondoolopa.”

“Sho ya thiki poWerhil Park, oya yi moostola dhimwe po momukalo guuhwapindi na oya yi yuuka koKFC mondjila yaMandume Ndemufayo. MoKFC, oya ponokele mostola nokuya moshipala uuthemba waalandi,” Embubulu a popi.

Okwa gwedha po kutya opolisi oya pula aahololimadhilaadhilo ya hulithepo shoka taya ningi ihe oya tindi sha etitha opolisi yuumbe omiku dhohaasa, dhoka dha etitha ya halakane. Omahololomadhilaadhilo ngoka gatameke Etine lyoshiwike sha piti, otaga pula Omupresidende Hage Geingob a tseyithe kutya omiyonena dhopaukashike kookantu odha ninga onkalo yopaulumomhumbwe moshilongo. Shoka osha titha etanga lyoSpecial Field Force Police li ithanwe. Etanga ndyoka olya umbu omiku dhoohasa, ooholo dhoongumi nokutula miipandeko aantu 26 mwakwatelwa aatoolinkundana yatatu.

Anne Ndeshipanda Awiigidha, gumwe gwomaanyasha mboka yali taya ningi omahololomadhilaadhilo okwa popi kutya aapolisi mboka oya kala nokumudhenga nonando okwe ya pula ya hulithe po oku mu dhenga. “Kanda li tandi tondoka onda li tandi ende, ayehe oye ya kungame na ya tameke taya thanga ndje. Oya yi na onda thikama nokutameka tandi ende na oya galuka natango na oya tameke taya thangandje.”



Epangelo lya yamukula

Omuprima, Sara Kuugongelwa-Amadhila mOlyomakaya kongulohi okwa popi kutya epangelo olya nongela kombinga yomukandanyenyeto ngoka gwa gandjwa komupopi gwomutumba gwopashigwana, na oli na olukeno konkalo yomiyonena dhoka dha lundalala moshigwana ngashiingeyi. Kuugongelwa-Amadhila okwa popi kutya epangelo otali ka yamukula komukanda ngoka mEtiyali konima yomutumba gwokabinete.



Egameno lyaatoolinkundana

Momukanda ngoka a pititha mOlyomakaya, Ronelle Rademeyer, amushanga-ndjai gwoEditor's Forum of Namibia (EFN), okwa popi kutya ehangano lyawo olya limbililwa kelongitho lyoonkondo okuza ketanga lyoSpecial Field Force lya ningilwa aatoolinkundana.

“EFN okwa limbililwa woo komapopyo gamwe po ga ningwa kaanambelewa yopolisi ga ningilwa aatoolinkundana ngoka taga ulike okwaahasimaneka emanguluko lyiikundaneki, ndyoka li li uuthemba wopakotampango.”

Rademeyer okwa popi woo konkalo yaanambelewa yopolisi taya imbi aatoolinkundana ya longe iilonga yawo.

“Shika osha kwatelamo oshiningwanima shomomwedhi Juni, moka omutoolinkundana gwoNamibian Sun, Jemima Beukes oshowo The Namibian, Charmaine Ngatjiheue ya li ya kwatwa komalutu kaapolisi omanga ya li miilonga pepatululo lyendiki lyokwiikalekela aapangwa yoCovid-19, moWindhoek Central Hospital. Epatululo ndyoka olya ningwa kOmupresidende Hage Geingob.”