Opolisi ya yambidhidha mboka ye li mompumbwe

Osha li omahodhi genyanyu shokakukutu komatanga gopolisi Joseph Shikongo niilyo yewiliko lyopolisi ya gandja oshimaliwa shoN$10 000 kofamili yomomukunda Omatando moshitopolwa Oshana.

Iinima ya gandjwa oya kwatelwa mo omatalashe, uushako wepungu, uushako wolwishi, uutite wosuuka, niipumbiwanima yilwe ya simana. Ayihe kumwe opolisi oya gandja N$ 30 000 kosenda yoDr Frans Aupa Indongo Special Care Centre mOkandjengedi nokegumbo ekwawo momukunda Oshuulo.

Oonakumona omauwanawa oya hogololwa mo okupitila mookamunsela nooyene yomikunda mboka ya totha mo omagumbo ge li mompumbwe onene yiipumbiwanima . Shikongo okwa fatulula kutya opolisi oya tota po oshiketha moka aanambelewa melelo haa gandja ethele kehe komwedhi opo ya vule ya gandje koshigwana moka taa longele.

Sylvia Shaduka omunamimvo 57, okwa li a nyanyukwa nomoshipala nomahodhi taga polinda. Shaduka okwa holola olupandu kopolisi yaNamibia taa ti oya li haa hupu mokwiinyangela yoyene, ngaashi mokulanditha omakwaava nomagadhi goongongo( ondjove).

Laurencia Nghidengwa omunamimvo 38, gwomomukunda Oshuulo mOshitopolwa saShana, okwa holola kutya maandjawo omu na aantu yahamano nokape na ngoka e na iiyemo. Nghidengwa okwa ti oya hupa mokulongela aashiinda momukunda ya mone okamaliwa.

Osenda yuunona tau lumbu nuulema

Endiki lyesiloshimpwiyu ohali gandja omukumo kehe esiku kaanona ya li moluhepo nale mOkandjengedi nomomidhingoloko dhopopepi.

Omusilishimpwiyu gwosenda Dr Frans Aupa Indongo Special Care Centre, Aili Shilongo, okwa lombwele Shikongo okwa toto po osenda ndjika konima yoomvula dha konda 20 nomwaalu gwaanona otagu tsikile nokukoka. Shilongo okwa ti omwaalu ogwa shonopala pethimbo lyomukithi gwoCovid-19, ashike omiyalu otadhi yi pombanda natango.

Okwa pandula aapolisi mboka ye shi ningi tashi vulika opo ya kwathwe.

Shikongo okwa ti oyi itaala osha simana okukwathela oshigwana. Onkene, eyambidhidho olya ningwa konima yoshigongiilonga oshitimugoyi shaanambelewa aanene yopolisi yaNamibia shoka sha pu mEtitano mOngwediva.

Shikongo okwi indile aanamagumbo mbaka ya longithe nawa iinima noyaa ye yi kondjele. Okwa gwedha po wo mbala kutya iinima itayi landithwa ashike otaa vulu oku yi topola naashiinda mboka tashi vulika ye li monkalo ya faathana.

"Hayo ku landithwa, noinayi gandjwa kepangelo, ashike onkambadhala yetu yene ongaapolisi tu ya kwathe yi ikwathe yoyene," okwa ti. Okwe ya indile yaa landithe po iinima, ashike ye yi longithe muuwanawa wawo yene.