Omapuko moonzapo ga thigi aailongi moUnam pomutenya

Aalongwantu ya konda po 50 yomoshiputudhilolongo shaUnam moshitayi shaRundu otaku hokololwa ya thigwa ya lulilwa ino itaa vulu okuninga omaindilo giilonga molwa omapuko moonzapo dhawo ngoka inaga opalekwa natango.

Oyendji yomaailongi oya ti oya dhimbululula omapuko poshituthipito shawo, yamwe otaa nyenyeta kutya oofani dhawo odha nyolwa nayi nenge dha nyolwa lwaali moonzapo dhawo.

Gumwe gomwaailongi ya gumwa koshikumungu shika, Paulus Ndumba, okwa lombwele Namibian Sun kutya nonande ya shunitha( gandja) oonzapo dhi ka pukululwe, oya li ya lombwelwa kutya okupukululula omapuko otaku ningwa oshiwike sha landula oshituthipito.

“Oya longekidha oonzapo dhetu, ihe omwa li omapuko pomadhina. Oonzapo owala 13 dha pukululwa sigo okonena. Omolwashike ngele ando inatu futa oskola, ando otaye tu piyaganeke, ihe ngashingeyi sho twaa na oondjo dhawo, itaye tu pe oonzapo dhetu? Ishewe kaye shi wo uunake taa ka tuma oonzapo dhetu. Otwa vulwa okutegelela,” okwa ti.

Itaa vulu okuninga omaindilo giilonga

Omulongwantu omukwawo ngoka inaa hala okupopiwa kedhina okwa ti ina vula okuninga omaindilo giilonga oshoka ke na onzapo (oku na owala omusholondondo gwiizemo.)

“Iitopolwa yimwe ohayi taamba omusholondondo gwiizemo momaindilo giilonga, omanga yimwe ihayi taamba. Oshiholelwa, ngele owa ningi eindilo lyiilonga koshitopolwa shaKavango Uuzilo nenge Kavango Uuninginino nenge kErongo, otashi vulika itoo ithanwa komapulapulo oshoka ohaa taamba owala oonzapo, hamusholondondo gwiizemo,” okwa ti.

“Ngele otwa lombwelelwe kutya otashi pula oomwedhi ndatu okupukulula oonzapo, ando inandi gandja yandje mbalambala. Ando onda ningi mo ookopi nokugana kopolisi kutya onzapo yandje oyi na epuko lyetopatopo ofani yandje ya nyolwa lwaali, nonda tegelela eopaleko. Kakele, onde yi shuna ko, noya dhima po ofani yimwe esiku ndjoka. Ngashingeyi, nande ondi shune ko koskola, onzapo yandje oyi na natango ofani yi li po lwaali yimwe ya dhimwa po,” okwa ti.

“Iilonga ohayi piti, nonande onda adha iipumbiwa, ite vulu okuninga omaindilo giilonga. Itandi vulu okuninga omaindilo nookuume kandje nayo otu li monkalo ya faathana. Otwa vulwa okuninga omaindilo ihe itatu yamukulwa sha. Inandi tseya naanaa kutya yangapi yomutse twa gumwa koshinima shika, ihe shi ikolela komusholondondo nda mona, otu vule 50,” okwa ti.

Oshinenenima

Omunandjungu gwomoRundu Frans Moyo okwa pula omolwashike aalongwantu taa indikwa omauwanawa goonzapo ye dhi ilongela.

“Omolwashike aalongwantu mboka ya longa nuudhiginini oomvula ndatu nenge ne naavali yawo ta futa oskola, taa indikwa omauwanawa goonzapo ye dhi ilongela omolwa epuko lyaaniilonga yaUnam mboka ya ndopa okulonga iilonga yawo nondjungu?

“Otatu pula kutya oonzapo dhetu nadhi longekidhwe mondjila muule woshiwike. Shika oshinenenima naUnam na tseye kutya oshike she endelela nosha simana. Aalongwantu oya longa nuudhiginini naavali yawo oya ninga oonkambadhala dhokuya futila. Oonzapo odhawo naUnam ne dhi gandje dhaa na omapuko,” okwa ti.

Ouniversiti inayi kwatathanwa nayo yi tye ko sha.

[email protected]