Olusheno lwondilo eshongo enene kaanangeshefa

Omupevi pelesitende gwehangano lyaanangeshefa aavalelwamo (Naloba) Kanu Amadhila okwa londodha, sha landula etseyitho lyegwedhelo lyondando yolusheno, ta ti oongeshefa otadhi nana nale nondatu nolusheno lwondilondilo otali tsikile okuya tula muupyakadhi.

Amadhila okwa gwedha po kutya olusheno italu vulika we kaanangeshefa nokaakwashigwana.

“Egwedhelo olundjilundji lyondando yolusheno olya patitha oongeshefa notali tsikile nokupatitha oongeshefa moNamibia. Olusheno kalu na we ombiliha moNamibia, kaanangeshefa aavalelwamo nokaanangeshefa ya za pondje yoshilongo. Olusheno oshitopolwa oshinene shoshilonga kehe shopaliko shokweetitha ekoko lya pumbiwa,” Amadhila a hokolola.

Amadhila okwa li ta yamukula komapulo gaNamibian Sun kombinga yetokolo lyOlutuwiliki lwOlusheno (ECB) okuzimina eindilo lyaNamPower a gwedhele ondando yolusheno noopelesenda hetatu.

Etokolo otali ti omahangano haga andjaganeke olusheno otaga ka thiminikwa ga gwedhele ondando yolusheno yi futile po olusheno lwondilo lwaNamPower.

Omaipulo

Amadhila okwa ti onkalo otayi ka nayipala oshoka iilongo ngaashi Zambia naSouth Africa, hoka hatu landa olusheno, itayi kwashilipaleke we otayi tu pe olusheno.

Okwa holola ondilo yolusheno oye etwa kendopo lyepangelo okutula miilonga oopoloyeka tadhi longo olusheno ngaashi Epupa hydropower nopoloyeka yoKudu gas.

“Osheetithi oshinene endopo lyokutula miilonga oopoloyeka dha etwa po nale ngaashi Epupa hydropower nopoloyeka yoKudu gas, noshowo ekanitho lyoonkondo dhokulanda olusheno kuZambia nethiminiko lyaEskom kAasouth Africa a ethe po ekwatathano lyokugandja olusheno kuNamibia,” okwa nyenyeta.

“Ondi wete otu li muudhigu, nenayipalo inali ya natango," okwa londodha.

[email protected]