Namuhuja a tindilwa ombooloha natango

Ompangu yOpombanda mOshakati moshiwike sha zi ko oya ekelehi etalululo lyeindilo lyombooloha moshipotha shaLeonard Pendapala Namuhuja, omugandjimayele nale gwaaprima, Nahas Angula nanakusa Hage Geingob.

Namuhuja, ngoka ta tamanekelwa oshipotha shekwatonkonga lyomupambele okanona komimvo omugoyi, okwa talululitha eindilo lyombooloha ye konima yokutindilwa ombooloha mOmpangu yaMangestrata gwaNdangwa.

Namuhuja okwa mangwa po momasiku 30 Apilili nota tamanekwa ekwantonkonga molwOveta yOkukondjitha Ekwatonkonga. Sho a holoka oshikando shotango mompangu momasiku 2 Mai, okwa tindilwa i ifutile mo, eindilo ndyoka lya tindwa kaayeti yiihokolola omolwa uunene woshipotha, notashi vulika ta ka mbandameka oombangi nomolwa uumbangi wu li po uunene. Konima sho mangestrata a tindi eindilo lye lyotango, Namuhuja okwa yi kOmpangu yOpombanda opo ando yi talulule etokolo ndika netegameno kutya otali ekelwahi.

Aapanguli David Munsu naDuard Kesslau oya talulula oshipotha shika, ya tala kuumbangi wa gandjwa pethimbo lyeindilo lyombooloha. Ahende yaNamuhuja okwa kondjo molwa uuthemba waNamuhuya wemanguluko nomolwashoka omufekelwa oha talika ko kee na ondjo manga inaa pangulwa; kakele, aapanguli oya dhenge omuthindo kutya uumbangi mboka wemanguluko nawu yelekanithwe naashoka shi li muuwanawa woshigwana, unenene miipotha mbyoka iinene ngaashi ekwantonkonga lyuunona uushona.

Ompangu oya holola uunene woshipotha shaNamuhuja, noya ti Namuhuya ota vulu okupewa egeelo lyokukala mondjedhililo. Aapanguli oya holola kutya oku mu pa ombooloha otaku vulu okutula moshiponga oshihakanwa notashi ipulitha oyendji egameno noonkondo dhoompangu dhetu. Aapanguli oya tala wo kohokwe onene oshigwana niikundaneki yi na moshipotha shika.

Ompangu oya ti oyi na uumbangi wu shi okwiinekelwa tau koleke kutya Namuhuja otashi vulika a mbandameke oombangi nokuya moshipala omakonakono. Uumbangihokololo womukonakoni owa dhenge omuthindo kutya ekwantonkonga lyuunona uushona olyo oshikulumuna oshinene moshitopolwa shika, shoka sha koleke nkene oompangu hadhi uungaunga nuukeka iipotha yoludhi ndoka.

Etokolo lyaMangestrata

Aapanguli oya popi wo kombinga yaa mpoka oonkondo dhawo dha hulila mokutalulula iipotha, oya fatulula kutya otaya vulu owala okweekelahi etokolo lyompangu yaMangrestrata ngele olya li lya “puka lela.”

Oya koleke kutya mangestrata okwa tokola shi ikolela konkalo, a longitha uumbangi wu li po opo a tinde okugandja ombooloha.

Ahende yaNamuhuja, okuza kehangano lyaanaveta lyoGreyling and Associates, okwa ti kutya Namuhuya na talike ko kee na ndjo manga inaa monika ondjo komupanguli, ahende okwa ti wo sho Namuhuya inaa tseyikila ngomulongi gwiikulumuna noku na omakwathathano omawanawa noshigwana ita fadhuka po nenge a piyaganeke omakonakono gopolisi.

Meindilo lye lyokutalululitha eindilo lyombooloha, Namuhuja okwa holola iikumungu inayi talwa meudhililo pethimbo lyeindilo lyombooloha ye oshikando shotango, mwa kwatelwa omahokololo “guutondwe” pokati kofamili ye noyoshihakanwa nomahokololo kutya oshihakanwa osha monika tashi dhana konima yomasiku gaali konima yoshiningwanima. Ompangu oya ndhindhilike kutya omahokololo ngoka inaga talika nawa pethimbo lyepulakeno lyeindilo lyombooloha lwotango, shoka sha shonopeke enwethe mo lyawo ketalululo lyeindilo lyombooloha. [email protected]