Guinas: Oomeme taya monene uunona mondjila

Ompumbwe yiipangelo nuuklinika moshikandjohogololo shaGuinas mOshitopolwa shaShikoto otayi tula moshiponga oomeme ye li momategelelo, oshoka ota ku hokololwa yamwe taya monene uunona mondjila yokuya kiipangelo nenge kuuklinika wokokule nenge taya monene uunona momagumbo molwa omakwatho gopaundjolowele itaga monika pethimbo.

Metalelepo pomathimbo ngaka lyoNamibian Sun koshitopolwa hoka, aakalimo oya holola omalimbililo gawo omanene sho ye wete ye ethiwa ngele tashi ya pomayakulo gopaundjolowele.

Ofaalama Ondera, ofaalama yomatulululo yi li ookilometa 45 okuza kOshivelo. Aakalimo oya taalela omashongo omanene ngele tashi ya pokumona omayakulo gopaundjolowele. Okweenda kokapate komamanya okawinayi, itaka opalele okweendwa kooambulansa molwa iilongitho mbyoka dhi na ya pumbwa okukwatwa nawa. Ooambulansa ohadhi vulu owala okuhulila petsakaneno lyondjila yoB1 yoTsintsabis-Oshivelo, naashika ohashi thiminike aakalimo ya longithe oohauto dhopaumwene, ndhoka oyendji itaya vulu okudhi futa, nomathimbo gamwe ohaya thiminikwa ya ende oshinano oshile shokuya kOshivelo kolupadhi.

Etungo lya tungilwe po pethimbo lyuukoloni mOfarm Ondera olyo hali longithwa ongosenda yuundjolowele, naapangi ohaye ya po lwaali momwedhi ya gandje omayakulo gamwe gamwe. Kakele, iiponga nenge omikithi dhonkalamwenyo, ayihe iyali inayi kwatelwa mo.



Esiloshimpwiyu lya nkundipala tali yematitha



Omukuluntu gwOfarm Ondera Jan Haneb okwa dhenge omuthindo konkalo ondhigu yoshigwana shaa hoka, ta ti: “Okapangelo kopopepi oke li kOshivelo, nolefa yokuya ko oodola N$50. Molwa ondjele yokwaa-na-iilonga yi li pombanda nayi, aantu oyendji itaya gwanitha olefa ndjika. Oshi lulumika okutala aakokele ye li kepango lyonkalamwenyo taya nyengwa okumona omayakulo gopaundjolowele. Okwoopaleka ehala lyetu ndika li ninge okaklinika, nande ando oke na omupangi gumwe, otashi ka kwatha noonkondo.”

Haneb okwa dhenge omuthindo kiilanduli mombwalangandjo yonkalo ndjika, ta ti: “Shika inashi tu guma owala otse atuke. Kehe ngoka ti iyadha moshitopolwa shika, ngele omutoolinkundana nenge ominista, ota taalelwa komashongo ngaka uuna e ehama. Okumona omayakulo guundjolowele okwo uuthemba wetu ongAanamibia.”

Okwa holola wo ompumbwe yokapangelo ka kwathe aanaskola oyendji yendji haya skola poskola yopomudhingoloko.

Omashongo ngoka natango oga taalela oshigwana shokoFarm Olavi noFarm Six, hoka kwa li omahogololo ga gwedhwa po mEtitano lya zi ko.



‘Oshidhigu’



Omukuluntuwiliki gwuundjolowele mOshikoto Joshua Nghipangelwa okwa koleke kutya moshikandjohogololo shaGuinas omu na ompumbwe yuupangelo ashike okwa ti kutya omolwa omwaalu omushona gwaantu moshitopolwa – inaa ya adha paantu omathele gahamano– okwe shi ningitha oshidhigu okutunga okaklinika. “Oshinima shino oshidhigu omolwa omwaalu gwaakalimo yaahoka. Ashike, ondi itaala aanapolitika noshikondo shuundjolowele ota y ka longela kumwe opo ya ninge omakonakono ga pumbiwa nokugandja shoka ya mono po kuuministeli wuundjolowele wu shi tale,” okwa ti.

Nghipangelwa okwa dhenge omuthindo kesimano lyelongelokumwe: “Mbaka aantu aakwetu noya pumbwa omayakulo gopaundjolowele. Otatu ka ya moonkundathana nakamunsela omupe opo a hogololwa tu tale ngele tatu vulu okukandula po uupyakadhi wawo.”