Epangelo lya nyengwa kuNgungula - Alweendo

Minista yOomina nIikwankondo Tom Alweendo okwa zimine kutya epangelo olya nyengwa okukondolola endjondjo lyomahooli kOnooli yaNamibia.

Alweendo okwa holola uunyengwi wepangelo mokukondolola endjondjo lyomahooli shaa li paveta omolwa uukwatya woongamba dhaNamibia nAngola pethimbo lyoshigongi niilyo yehangano lyaanangeshefa aavalelwamo (Naloba).

“Ekandulopo lyomukundu okukambadhala okukwatela po oveta, ihe uupyakadhi oshidhigu kuyo, shila ongele twa hala omatanga gopolisi taga kondolola oongamba aluhe. Oshidhigu shi li kuyo. Oonkambadhala adhihe twa kambadhala itadhi longo. Sigo otatu kala noondando inadhi lunduluka, itatu ka pondola omukundu nguka,” Alweendo a ti.

Omupevi presidente gwaNaloba Kanu Amadhila okwa ti iilyo yawo oyindji yi li mongeshefa yokulanditha omahooli otayi nana nondatu molwa endjondjo lyaa li paveta lyomahooli pokati kaNamibia nAngola.

Uunyengwi

“Minista, endjondjo lyomahooli okuza mo Angola okuya mo Namibia otali tsikile nokushunitha pevi eliko lyoshilongo nokupatitha oongeshefa odhindji, niilonga ya kana unene kOnooli yoshilongo. Aanangeshefa oyendji oya hehela iimaliwa koombanga noitaa vulu we nokugwanitha po omauvaneko gawo nomaliko gawo otaga ilwa po koombanga” Amadhila, ngoka e na oshitaasi shomahooli mOutapi, a hololele Alweendo.

Iitaasi yomahooli oyindji mOmafo nOndobe moshikandjohogololo Helao Nafidi oya pata, Alweendo a tseyithilwa.

Jafet Nakanue, mwene gwoshitaasi shomahooli EJ Service Station mOshikango, okwa ti okwa yi meuvathano lyopangeshefa naPuma, muulethimbo womimvo 25, nomongeshefa ina ninga mo oomvula dha adha komulongo. Okwa venisile owala nale mo2016 sho opo a patulula oshitaasi shomahooli, a hokolele Namibian Sun.

Nakanue okwa ti omvula oyo ndjoka ya tetekelwa kendjondjo lya tameke, ‘okusitha’ iitaasi oyindji moshitopolwa.

“Mo2016, onda landithile oopelesenda ethele. Oomvula dha landula ko odha kala iihuna. Onkalo ombwinayi.”

Pethimbo lyomukithi gwoCovid-19, oondando dhawo odha hwepopala sho oongamba dha patwa, ihe mbalambala odha shuna pevi sho aandjondji ya tsikile nongeshefa yawo, Nakanue a ti.