Ekongo lyuuyuuki lyaLubowski ‘lya si naGeingob’

Gabrielle Lubowski, omuselekadhi gwomunapolitika gwoSwapo a dhipagwa, Anton Lubowski, okwa ti eso lyapresidente Hage Geingob olya ya moshipala etegameno lyofamili yi mone uuyuuki meso lwaLubowski.

Lubowski, ngoka a li ohahende ya tseyika nawa noshilyo shoSwapo oomvula ndhoka, okwa hulitha uusiku wo 12 Septemba 1989 sho a yahwa nondjembo yoAK-47 pegumbo lye mOvenduka. Okwa li omunamvo 37.

Ofamili oya li ya tegamena tayi vulu okutsakanena naGeingob omvula ndjika, ya kundathane iinima ya pamba etsakaneno lye lya hugunina naLubowski uusiku weso lye.

“Otwa li twa inekela kutya mo2024 otwa li tatu ka tsakanena naGeingob nahugunina ote ke tupa uuyelele mbu ena po pokombinga yankene yo naLubowski ye ende mepandaanda lyaKaiser [ngashingeyi Independence Avenue] yaa na aagameni yawo, opo oonkundathana dhaa uvike komuntu,” Gabrielle a ti.

Lubowski okwa tsakanene naGeingob kuulalelo manga eponokelo lye inali ningwa esiku olyo tuundyoka.

Montumwafo ya nyolelwa Geingob mo 2019, Gabrielle okwa pula nakusa omupresitende kutya oshike sha li oshiholekwa noka ya li itaya vulu okukuutumba mehala lya gamenwa ya kundathane oshikundathanwa.

“Ongoye omuntu gwahugunina Lubowski a popya naye. Okwa topola nangoye uuyelele wa holekwa mboka ne yaali mwa li itamu vulu okukuutumbila nokakopi kokoothiwa. Oowili oonshona lwanima, Lubowski a hulitha,” okwa nyola pethimbo ndyoka.

Onkundana yeso lya Geingob mu4 Febuluali oya dhenge ofamili nayi, Gabrielle ati.

“Oye tu dhenge pomutima. Otwa li twi inyengithwa noonkondo notwa kengeleke omahodhi.”

‘Kalunga oye owala ta vulu oku tu hekeleka’

Oonkundathana dha tegelelwa ethimbo nuule ando odha mweneke okwaashiwo kwa kundukidha eso lyaLubowski, Gabrielle a ti.

“Ka twa li owala tatu kongo oshikalimo shoonkundathana ndhoka, otwa li wo twa yuulukwa etaambo nezimino lyuuwehame auhe, ehepeko nokutondwa twa kala noku taalela. Geingob oye owala a li ta vulu oku tu pa ombili yokomwenyo noku tu galulila uuntu wetu tu humbate uuthiga nuuntsa,” okwa ti.

Okuza eso lyaGeingob, ofamili ngashingeyi oyi na okutaamba ko kutya ita yi ka mona uushili mboka ya li tayi kongo, Gabrielle a gwedha po.

“Kalunga oye owala ta vulu oku tu hekeleka ngashingeyi, oshoka otu na okutaamba ko kutya etsakaneno lyoshili lyedhiminopo netaambathano olya gwa mo momake getu sigo aluhe.”

‘Omapopyo ga nika uuhasha’

Momukokomoko gomimvo, Geingob okwi ikala ekuthombinga medhipago lyaLubowski. Montumwafo ya nyolelwa Gabrielle okupitila mohahende ye Sisa Namandje, Geingob okwa ithana omapopyo ga Gabrielle ga puka.

“Omapopyo goye kondandalunde oga puka noge na uukwatya waa shiwike mokutya kakele kedhipago li nyanyaleka lyaLubowski lya kala oshitopolwa shomakonakono gopolisi – ngoka ga pula ayehe, wa kwatelwa mo, wu na uuyelele [wu] kwathe opolisi – nomakonakono moshigwana gOmpangu yopOmbanda, ongoye owala to ningi omapopyo ngaka ga nika uuhasha konyala oomvula 30 konima so asi,” Namandje a ti.

Omukwashigwana gwaIreland Donald Acheson okwa tothwa mo onga omuumbi medhipago.

Nonando opwali uumbangi owundji wu li ompinge naye, okwa mangululwa konima yoomwedhi hetatu mokakuma moSouth Afrika lyokatongotongo ethimbo ndyoka. Kapena nando okambadhala ya ningilwe okugandja Acheson ku Namibia a pangulwe moshikumungu shika, nomo 1991, okwa tidhilwa koIreland onga ekwamukuli inali halika.