CPBN a gandja otendela dhongushu yoobiliona N$8.1

Ehangano lyoCentral Procurement Board of Namibia (CPBN) olya tseyitha kutya olya gandja ootendela 32 dhokumbesitela dhongushu yoobiliona N$8.1 momumvo gwoshimaliwa 2023/24, tashi ulike ekoko noobiliona N$4.8 okuyelekanitha nomumvo gwoshimaliwa gwa piti.

Mootendela dha gandjwa kepangelo momumvo gwoshimaliwa gwa piti dhongushu yoobiliona N$8.1, ootendela dhongushu N$7.1 odha pewa omahangano gomoNamibia, Omukuluntupitithi ta kwathele gwoCPBN Amon Ngavetene a ti.

Shi na sha nootendela dha gandjwa momumvo gwoshimaliwa gwa piti, oopoloyeka dhongushu yoobiliona $7.2 odha pitile momatseyitho gopaipindi ga yela, okuyelekanitha noobiliona $2.2 dhomomumvo gwoshimaliwa gwa piti.

Okukoka kwongushu momathaneko gomambistelo kooshimwe nooshimwe okuza komauministeli – okuza koomiliona N$932 mo2022/2023 okuyelekanitha noobiliona N$2.4 mo2023/2024 – olya gandjwa wo onga limwe lyomomalunduluko omanene.

Aayakulwa yaCPBN olundji oyo uuministeli wuundjolowele nowelongo, NamWater naRoads Authority( Ehangano yokutunga oopate.)

Omiti tadhi nyangwanyangwa

Pokati mpoka, omanga ta popitha aatoolinkundana ohela moshigongi shiikundaneki, Ngaventene okwi ikaleke kokule nomapopyo kutya omifango dhoCPBN dhomambestelo ga kitakana odho tadhi etitha iipangelo nuuklinika wu kale waa na omiti moomvula ndhika.

Shi ikolela kolopota ya hugunina yomayalululo guuministeli wuundjolowele yomomumvo gwoshimaliwa 2022/23, omambestelo giikwaniipangitho yopaunamiti yopaulumompumbwe yongushu yoomiliona N$23 oya li inayi mbestelwa oshoka anuwa uuministeli owa kala wa tegelela CPBN okuza mo2017 a manitha nomifango dhokumbesitela.

Uuministeli owa ti oshe eta onkalo yokunyangwanyangwa komiti olundji, shoka hashi tula uundjolowele (oomwenyo) dhaantu moshiponga. Ongamba yokumbesitela yuuministeli oomiliona N$25.

Molwa omashongo mokugandja ookontalaka ndhika dhethimbo ele, anuwa uuministeli owu li mo nayi koku landa iikwaniipangitho yopaulumompumbwe yi na ondilo, opo ku kwashilipalekwe uuklinika niipangelo oyi na iiyakulitho nomiti. Ngashingeyi ota ku dhiladhilwa uuministeli wuundjolowele wu kuthwe moomango dhomainda moveta yomambesitelo.

Kakele, Ngavetene okwa pula ngele omu na tuu uukwashili mehokololo ndika.

"Inatu yakula nande nale eindilo lyomambestelo lya za kuuministeli wuundjolowele kombinga yotendela yokukondjitha oombuku nuumbishi( omaaluhwa) miipangelo. Omolwashike ye na omukundu nguka natango, ngele kehe shimwe otashi pelwa ombedhi CPBN?" Okwa pula.

Omashongo kehe pamwe

Ngavetene okwa ti omufango gwomambestelo ohagu yi kompangu ekengelelo ( hagu hokololitha omuntu) nohagu vulu okukondjithwa ethimbo kehe.

"Kakele, oshili oondjika kehe motendela yuundjolowele twa kondjithwa, ngele pamuthika gwomapulapulo nenge mOmpangu yopOmbanda, uuministeli naCPBN ohaa ye ya po nonkambadhala onkwawo, shoka hashi pitike uuministeli wu konge omayakulo gopakathimbo opo kiipangelo kwaa pwe thiluthilu omiti.

“Notendela yopaunamiti ya kalekwa, otwa mbesitele okashona ka adhe koomwedhi hamano shi thitike omwaka. Pethimbo olyo tuu ndjoka, uuministeli owa pitikwa wu mbesitele iiyakulitho ya gwana omvula( moomwedhi omulongo nambali) ku thitikwe omwaka. Oshikumungu oshi li natango mOmpangu yopOmbanda. Otwa tegelela etokolo mu31 Mei, " okwa ti.

"Ihe itaa vulu kutya kaye nasha [omiti] ngashingeyi omolwa omufango gwomambestelo," okwa dhenge omuthindo.

"Oya pumbwa owala okuyamukula kutya oshike hashi ningwa po mokumbestela" Ngavetene a gwedha po.