Aagundjuka yaa na iilonga muumbwanda komalungula

Omilalo inadhi gamenwa opo dhi li
Oondando odha za koombwanda dha yooloka: Okudhengelwa amudhulungu pavideo: N$50 Omafano gamudhulungu: N$50 muuvideo 20 Omilalo inadhi gamenwa: N$150 Olweetho lumwe: N$250 Iihulo yayatatu: N$600 Uusiku wumwe: N$600 Ehuliloshiwike alihe: N$1 500
Mariud Ngula,Rita Kakelo
Molwa okwaa na iilonga kwa vuka, aakiintu oyendji aagundjuka Aanamibia otaa ilanditha komapandja gopankalathano ga yooloka. Yamwe aashuushuka yomimvo 18 oya eta po omapulakata taa halitha omalutu gawo.

Namibian Sun okwa mono pomathimbo ngaka omapulakata ogendji moka oombwanda dha gandja oondando dhawo, mwa kwatelwa ondando ‘yomafano gamudhulungu’, ‘olweetho lumwe’, ‘iihulo yayatatu’, ‘uusiku umwe’ nehuliloshiwike alihe, oshowo ondando ‘yolweetho lwomilalo inaadhi gamenwa’.

Eyakulo lyahugunina, lyomilalo inadhi gamenwa, olya talika ko lya nika oshiponga lela. Ta popi kopolohalama yoThe Evening Review koNetwork TV pomathimbo ngaka, amushanga omukuluntu muuministeli wuundjolowele Ben Nangombe okwa holola kutya omukithi gwoHIV/AIDS ogu li natango eshongo moNamibia – konyala aantu 5 000 ohaa kwatwa kombuto kehe komumvo.

Omwaalu gwogwene otashi vulika omunene, oshoka haantu ayehe ya kwatwa kombuto ya konakonwa omukithi nguka gwohoni gwaa na epango.

Omukalo nguka gwuumbwanda komalungula otagu ulike onkalo ondhigu yopaliko tayi thiminikile oohandimwe mbaka miilonga noonkalo dha nika oshiponga, uukwashili owa kolekwa kugumwe gwomoombwanda. Sho oshifokundaneki shika sha kongo mwene gwepulakata limwe, omutoolinkundana okwi itsu momugundjuka gwoomvula 18 – a etha oskola nokwa yambukile kOutapi, ngoka hi ilandithile moondjugo dhokulala mOvenduka opamwe nakahewa ke gwoomvula 20.

Molwa ofuto yoskola

Ta popi naNamibian Sun noinaa hala okupopiwa kedhina, Fixxy (halyo edhina lye lyolela) okwa holola okwa zi kegumbo kOutapi nelalakano okufadhuka onkalo ya nayipala pokati ke naakwanezimo, mboka ta hokolola hanga ye mu etela.

Okwa holola kutya okuza Novemba mumvogu, okwa tokola okwiilanditha puuyelele komalungula nokutya oha ithaneke uuvideo e li miihulo kondando ya gwedhwa po opo a hupe.

“Onda thiminikwa okuya mongeshefa ndjika omolwa onkalo nomolwa oluhepo. Onkalamwenyo inayi kala ompu kungame. Onda mona iihuna mouputuka. Ngame naakuluntu yandje ihatu uvathana, shoka osho sha thiminike ndje ndi ze ko kegumbo ndi ye kOvenduka sho nda li ndi na omimvo 11. Onda kala mOmbili, moka he futu ohiila N$150 mela lyaa na omeya nolusheno. Ngashingeyi otwa kala moondjugo dhokulala," okwa dhimbulukwa.

“Otandi longo ayihe mbika ndi mone oshimaliwa ndi vule okumana oskola yongula omvula tayi ya,” okwa ti.

Ina mona iilonga

Omukiintu gwoomvula 24 gwomolukanda lwaGoreangab moKatutura okwa holola kutya okwa ndopa moskola nokwa thiminikwa okuya muumbwanda oshoka ina vula okumona iilonga yilwe i ikwathele. “Ando onda li he longo, ando inandi ninga shika. Ngele onda mono iilonga, otandi etha uumbwanda,” okwa ti. “Ondi na ookuume kandje hatu longele pamwe tu mone ookastoma. Ohatu pula N$250 molweetho kehe.”

Pokati mpoka, ‘omunangeshefa’ gwomOshomeya okwa ti oku na oombwanda, ndhoka hadhi gandja omayakulo ga yooloka. ‘Omunangeshefa’ omulumentu ngoka a kongele oombwanda aalumentu, ye ta mono ko okamaliwa kofuto yawo. “Aakiintu oye na N$200 ongulohi kehe,” okwa ti.

Namibian Sun okwa pula uuministeli wuukashikekookantu nuuthikepamwe ngele owu na olukalwa lwoohandimwe mboka taa kondjitha okukwatwa ko kiihulo nenge taa hepekwa noya hala okushendja oonkalamwenyo dhawo mepambathano naashika.

Mokuyamukula, omupopiliko guuministeli Lukas Haufiku okwa ti uuministeli kawu na opolohalama kondandalunde manga, ashike ohau gandja eyambidhidho lyehungomwenyo koohandimwe opo ya lumbe niikumungu yopankalathano mbyoka taa piti muyo. Okwa gwedha po kutya uuministeli ou li wo ongehala lyokutuminwa aantu kaakuthimbinga ye na mosha, mwa kwatelwa aahungimwenyo, uuministeli wuundjolowele nopolisi.

Okwa ti kutya oopoloholama dhuuministeli dhokunkondopeka aakiintu ndhoka ohadhi kwatha okuyambula po aakiintu moshigwana. “Yimwe yomoopolohalama dhetu – yokweeta po iiyemo – oya nuninwa aakiintu moshigwana nokuya kwathela okweeta po iiyemo okupitila muunyangadhalwa uushona wokweeta po oshimaliwa yi inkondopeke yoyene,” Haufiku a ti.

Oveta itayi ti kosha ngele uumbwanda owu li paveta nenge aawe

moNamibia, amushanga omukuluntu muuministeli wuuyuuki Gladice Pickering okwa ti: “Kamu nasha mekotampango [kombinga yuumbwanda]. Oto tseya kutya pomathimbo ngaka opwa li oshipotha kombinga yokweendwa konima nosha talika nOveta yOmaihumbato inaaga pitikwa, ndyoka oveta onkulu, mupya munene, oyi li miilonga natango”.

Comments

Namibian Sun 2024-11-23

No comments have been left on this article

Please login to leave a comment

Katima Mulilo: 23° | 38° Rundu: 24° | 35° Eenhana: 23° | 35° Oshakati: 25° | 34° Ruacana: 24° | 35° Tsumeb: 22° | 33° Otjiwarongo: 20° | 32° Omaruru: 22° | 36° Windhoek: 21° | 33° Gobabis: 23° | 34° Henties Bay: 15° | 19° Swakopmund: 15° | 16° Walvis Bay: 14° | 23° Rehoboth: 21° | 34° Mariental: 21° | 36° Keetmanshoop: 18° | 36° Aranos: 22° | 36° Lüderitz: 15° | 26° Ariamsvlei: 18° | 36° Oranjemund: 14° | 22° Luanda: 24° | 25° Gaborone: 22° | 36° Lubumbashi: 17° | 34° Mbabane: 18° | 32° Maseru: 15° | 32° Antananarivo: 17° | 29° Lilongwe: 22° | 35° Maputo: 22° | 36° Windhoek: 21° | 33° Cape Town: 16° | 23° Durban: 20° | 26° Johannesburg: 18° | 33° Dar es Salaam: 26° | 32° Lusaka: 22° | 36° Harare: 20° | 31° #REF! #REF!