Omukwatinkonga a hala egeelo lye li talululwe

Omulumentu ngoka mo2010 a tsu omukiintu nombele iikando iheyali mombunda noku mu kwata koonkondo manga ine mu thiga mpoka, ngashingeyi okwa hala okutalululitha egeelo lye lyoomvula 45 mondholongo.

Axarob Basson okwa li ha longele mofaalama komudhingoloko gwaMalinda manga inaa kwatwa po nokuzimina ondjo mOmpangu yopOmbanda moVenduka miipotha yedhipago, yekwatonkonga nokuteya egumbo.

Omupanguli Naomi Shivute okwa tokolele Basson egeelo lyoomvula 45 mondholongo – oomvula 30 mondholongo medhipago noomvula 15 mondholongo mekwatonkonga neteyo lyegumbo nelalakano lyokukwata onkonga.

Shi ikolela kokutokolwa kwaBasson pethimbo ndyoka, oya li ye shaathane nanakusa noya li mofaalama ayehe uusiku omukiintu a dhipagwa.

Okwa li a hala a ye naye miihulo, shoka sha tindwa kunakusa. Okwa zi mo megumbo nokugaluka nale mokati kuusiku.

Shi ikolela koodokumende dhomohofa, Basson okwa pitile mekende manga nakusa a kotha. Okwe ende sigo opomweelo gwondunda ye, ihe ogwa li gwa pata.

Anuwa nakusa okwa penduka kekudhilo nokuza mo mondunda a ka konakone shoka tashi kudhile.

Basson okwa ka holama mokombitha.

Sho nakusa e ya mokombitha, Basson okwa kutha omwele noku mu tsa konyala lwiikando iheyali mombunda.

Nakusa okwiihata po nokutika ombinzi noonkondo. Omutamanekwa okwe mu longele omuyonena gopaihulo naasho a mana, okwe mu thigi mpoka.

Okwa yi mokuti moka a kala omasiku gamwe manga ina mangwa po.

Basson okwa holoka komeho gomupanguli Shivute mOmpangu yopOmbanda moVenduka Omaandaha neindilo lyokutalululitha egeelo lye mOmpangu yopOmbanda.

– [email protected]