Oshipangelo shaRundu shaa na omiti otashi shololitha oondohotola

Oondohotola mOshipangelo shaRundu, unenene mosaala yomathikilo (yepango lyomeendelelo), otaa shololithwa unene konkalo yomiti dhaavu yawo dhaa po olundji.



Ndohotola gumwe, ngoka inaa hala okutumbulwa kedhina okwa lombwele Namibian Sun kutya olundji oha kala u uvite “kee na oonkondo dhasha”, ongo taa mbweenga aavu omolwa okwaa po komiti (epango) dha simana.



“Ohashi ku ningi wu kale waa na oshilonga. Oshiholelwa, uuna twaa na omakende gomeya nombinzi, oho thigwa wa limbililwa nkene to kwathele omuvu. Iikunguluki yontumba oya pumbiwa yi kwathe omuvu, ashike uuna kaa pe nasha, oho thigwa waa nankene wu ninga. Omathimbo gamwe, owu na okutya owala omuvu na shune kegumbo inaa pangwa nawa, nohashi ku ipulitha kutya owa yile shike kiilonga ngele kape na omiti. Osigo uunake tashi kala ngeyi? Osigo uunake tatu tegelele omiti ndhika dhi thike?" ndohotola a pula.



Ndohotola gulwe naye okwa holola omaiuvo ge kombinga yonkalo tayi hweenene yomikithi dha kolonda:



"Okwaa po komiti dha simana ngaashi oantibiotika otaku eta omikithi dhi kolonde. Nalumwe, oto gandja omiti komuvu noku mu laleka konima yethimbo efupi oshoka omiti itadhi gwanene, shoka hashi eta omikithi dhi kolonde. Osha fa twa taalela onakuyiwa ndjoka tashi vulika itaatu ka vula okupanga omikithi dhakwalukehe omolwa ompumbwe ndjika yomiti,”



"Oshiwinayi shili. Oshili, oshiwinayi. Uuna to popi noshiivaasa, ohaye shi tala ko shanathangwa. Ohaa ti owala shi li kOnkumbi osho shi li kEwale. Ashike ngele shika osha guma oshilongo ashihe koonono, tse, ongoshipangelo, otatu ningi shike tu thitike omwaka nguka gwompumbwe yomiti niikunguluki? Otatu ningi ngaa sha? Otatu thiminike tuu uuministeli wu kandule po omukundu nguka nokuwu tseyithila kutya oondohotola dhetu itadhi vulu okwiidhidhimikila onkalo ndjika?"



Michael (halyo edhina lye lyoshili), omuvu, ngoka a mona uuwinayi wokwaa po komiti kuye mwene, okwa lombwele Namibian Sun oshi yemateka okuya koshipangelo olundji, nokulombwelwa owala kutya omuti wa shangelwa kundohotola kagu po.



“Onda kambadhala omikalo dhilwe nda lombwela, ashike ihadhi mweneke nande uuwehame. Oshi yemateka okutseya kutya kakele kokuya aluhe koshipangelo, otandi mono iihuna natango. Otwa pumbwa ombethele (uupitilo) wokumona epango wu shi okwiinekelwa,” okwa ti.



Omuvu omukwawo e enda monkalo ya faathana, okwa ti okwa kala nokuya koshipangelo ethimbo nuule ngashingeyi, netegameno okumona omiti ndhoka a pumbwa, ashike oshikando kehe oha lombwelwa kadhi po natango.



“Uuwehame ndi li muwo uunene, nomikalo dhilwe ya lombwela ndje ndi longithe ihadhi kwatha sha. Osha fa handi pewa etegameno lyiifundja aluhe ngele nde ya koshipangelo, nohandi shuna aluhe nuuwehame wandje ngaashi ndi ile nawo.”



Mokuyamukula kompumbwe ndjika, Omukuluntu gwOshipangelo shaRundu, Jean Kabangu, okwa fatulula kutya embestelo lyomiti ohali ungaungiwa nalyo kOmpungulilo yOmiti moshilongo.



"Omu na oompungulilo mbali moshilongo: yimwe omoRundu, moshitopolwa shetu, nonkwawo okOshakati. Tse ongshipangelo katu na oonkondo dha sha komambestelo, oshoka ohaga ungaungiwa nago kuyalwe. Oshinakugwanithwa shetu pamuthika gwoshipangelo okutaamba owala omiti nokudhi kwata nawa," okwa ti.



Kabangu okwa gwedha po kutya uuna oshipangelo shaa na omiti moapoteka, ohashi pula kOmpungulilo yOmiti yoPashitopolwa shi pewe omiti dhopakathimbo.



"Ngele omiti dhimwe dhomembistelo lyotango inadhi thika moshipangelo, oapteka ohayi tula mo embestelo lyopakathimbo konale. Omathimbo gamwe, ohatu kongo omiti kOmpungulilo yOmiti yoPashitopolwa."



Oshipangelo oshi na wo ontengenekothaneko yokulanda omiti dhontumba ndhoka ihadhi adhika nuupu mOmpungulilo yOmiti mOshilongo.



"Oshiholelwa, mOhapi (kiifudhitho) yetu yuuhanona, ohatu longitha omiti ndhoka ihadhi adhika nuupu mOmpungulilo yOmiti mOshilongo, oshoka ohadhi endelele nohadhi pu mo mbala molutu, nosha ninga oshidhigu kOmpungulilo yOmiti mOshilongo yi dhi mbestele. Ohatu mbestele omiti ndhika uuna sha pumbiwa," Kabangu a ti.



Amushanga omukuluntu mUuministeli wUundjolowele Ben Nangombe ina vula okukwatathaniwa naye a tye ko sha manga oshifo inashi shi nyanyangidhwa.



[email protected]