Oonkambadhala dhepangelo okukwatha Aangola dha ponyo

Ongundu yaakwashigwa Aangola mboka ya kala nokweendaenda momapandaanda moNamibia taa landitha omaluko konyala ethimbo lya konda pomvula oya ponokele ohela omupevi minista gwiikwameni, egameno nepopilo Lucia Witbooi sho e ya kongele olukalwa lwopakathimbo mOndangwa.

Ongundu ndjika, oyendjo oomeme nuunona, oya lombwele Witbooi naanambelewa yalwe yokoongamba kutya inaa nyanyukilwa okukala mosenda yaagundjuka mOndangwa, moka ya kala mo inaka thika piiwike iyali. Shi ikolela minista, ndika ekwatho lyopakathimbo manga tau kundathana nepangelo lyAngola. Etalelopo lye kosenda olya landula etokolo lyokabinete aantu mbaka ya kuthwe mo momapaandaanda nohugunina ya hanganithwe naakwanezimo yawo mo Angola.

Okundjondjwa kwaantu

“Otwe ya totha mo payambidhidho nelongelokumwe lyepangelo lyAngola. Otatu longitha omatsokumwe giilonga iyali okuya shunitha momidhingoloko( miigwana) yawo” Witbooi a ti.

“Otatu tala wo koshikumungu shokundjondjwa kwaantu moshilongo, ihe shika kashi shi oshilonga oshipu. Omakonakono oge li metifa moshikondo shi na oshinakugwanithwa nongele oya dhimbulula kutya okundjondjwa kwaantu oshitopolwa shasho, otashi ka ungaungiwa nasho.”

Ngashingeyi, uuministeli owa gandja omala gaali gokulala – limwe lyootate nolyoomeme nuunona. Uundjugo nokombitha - nomuteleki- omo ye li wo mongundu ndjika.

Okwa tegelelwa Angola

Witbooi okwa ti epangelo lyaNamibia oli na iiyakulitho ayihe pomahala opo ku longekidhwe omalweendo gayakwetu mbaka okupitila koongamba dhaShikango pokati ka Namibia nAngola.

“Konima, epangelo lyawo tali tsikile ko. Otwa li moonkundathana nayo [nepangelo lyAngola] nena noya holola kutya otaa tula iinima pomahala manga opo ye tu pe endhindhiliko tu ya mangulule. Ngele Angola ota ti ‘okwi ilongekidha’, nena otatu ya thindikile,” okwa lombwele ongundu ndjoka ohela.

Omupevi minista okwa gwedha po kutya epangelo lyaNamibia itali ka pitika we ya kale taa endaenda momapandaanda, unenene uunona uushona wa gwana okukala moskola.

Itaa galuka we

Ta tolokelwa, omukiintu omuAngola – ngoka a tindi okupopiwa kedhina – okwa pula Witbooi kutya oshike tashi ningwa po ngele gumwe gomuyo okwa sile mosenda. Okwa hala okutseya olye ta kala noshinakugwanithwa shefumbiko komapepe ge, oshoka ohaa zala iikutu yopamuthigululwakalo, noye na omukalo howina gokungaunga nasho shi ikolela komithigululwakalo dhawo.

Ku shika, omupevi minista okwa ti okwiinekelwa itashi ka ningwa, nokudhenga omuthindo ekwatho olyopakathimbo notaa ka tembuka mbala.

“Inatu pumbwa ombesa. Otwe ya mo Namibia kolupadhi notwi ilongekidha okushuna [kolupadhi]. Itatu ka galuka we nande,” ongundu yi igidha sho Witbooi te yi popitha.

Konjma yokulombwela ongundu omalongekidho ge li po, engungutulo olya tameke. Oya hokolola oya edhililwa kaa shi li pahalo lyawo noya hala okushuna kolupadhi koshilongo shawo. Inaa hala omakwatho gasha okuza kepangelo lyaNamibia nenge lyAngola, oya gwedha po.

Aapolisi naagameno yomaliko oya li ya pata iiyelo yosenda opo ya keelele Aangola yaa ze mo mosenda omanga Witbooi a tala ko. Lwanima, aakwashigwana yAngola oya zimine okulya omwiha, ihe konima yokathimbo, oya ningi omatilitho otaa shuna natango nosheelo osha patwa ishewe.

– [email protected]