Ompumbwe yoopate komikunda

Ookamunsela yokOkavango Uuninginino oya holola eyeme lyawo mwaashoka taya ti epangelo olye ya ethela iikandjohogololo yawo, oya totha mo ompumbwe yoopate oyo yi li ongeinda enene lyehumokomeho.Sigo okonena, iitopolwa oyindji moKavango Uuninginino kayi na natango uupate wuuholondo, shoka hashi thiminike aakalimo yokiitopolwa yokuushayi ye ende ondjila oonde opo ya ka mone omayakulo ga simana. Nonande eyokomeho otali imonikila miikondo yimwe, etungo lyoopate, uunenene uupate wuuholondo, ngaashi miikandjohogololo Kapako naNcamagoro kamu nasha. Aakalimo oya tongolwa ko, nompumbwe yoopate otayi yi moshipala oompito dhokumona elongo, iilonga nomayakulo gopaundjolowele.Kamunsela gwOshikandjohogololo shaKapako Johannes Karondo okwa hokolola ehokololo li yemateka lyonkalo yawo, okwa ti aakalimo yamwe shi valelwe ya kale pooha dhopate.“Uupate wuuholondo owo eshongo enene natango. Shampa oondjila dhokolela dha tungwa, omangeshefelo ohaga nkondopekwa, okweendathana ohaku pupala noopate ohadhi kwashilipaleke aantu otaya vulu okuya kiipangelo nokomandiki gomangeshefelo. Ndyono olya kala eshongo ekulukulu lyaakalimo yomoKapako,” Karondo a ti.“Sigo okonena, mokati komaindilo getu gahamano gokutungilwa oopate moshikandjohogololo, kape na nando ndjoka lya yamukulwa nawa. Omanga kiitopolwa yilwe aantu otaya pula ngaashingeyi oopate dhooteya, huka koKapako, otatu pula natango uupate uuholondo wowenewene”.Etegameno ewanawa Karondo okwa holola omukumo gwe meyokomeho monakuyiwa: “Ondi indila Okakomisi kOmathaneko goPashigwana ka tale kiikandjohogololo ayihe ngele tashi ya kehumo komeho. Otatu longo nomaindilo ogendji, unenene gokutungilwa oopate. Otwa tegamena kutya muule woomvula mbali dhi li komeho, otatu ka tungilwa ando ngaa opate yimwe. Pamwe nuumvo, okutungwa kokapate kamwe kokaholondo ota ku piti opo ka tungwe.”Kamunsela gwOshikandjohogololo shaNcamagoro Thomas Rengi okwa hokolola uupyakadhi wa faathana naanaa naambu womoshikandjohogololo.she, ta ti okuza sho oshikandjohogololo sha totelwe po inamu tungwa nando okapate kamwe kokaholondo. “Oshikandjohogololo Kapako osha palathana oongamba niikandjohogololo ngaashi Musese naMankumpi, ashike iitopolwa ayihe mbika kayi na okapate kokaholondo ke yi kwatakanitha kumwe. Otwa pumbwa ando uupate womamanya uyali nenge utatu wu kwatakanithe aanamukunda joopate dhooteya oonene ngaashi ondjila onene ya Trans-Zambezi,” Rengi a ti.Kamunsela gwOshikandjohogololo shaMankumpi Lukas Muha okwa gandja olupandu lwe molwa okapate kaAlex Muranda hoka ka tutilwa omavi ogendji, naasho oshitopolwa shotango shokutunga okapate koholondo sha pwa.Uuthikepamwe tau indjipala Sha landula omatalelepo gaanambelewa kiitopolwa ayihe 14, okakomitiye koparliamende ke lile po ondalaspota, iikwamatungo nomagumbo oka lopota kutya oopate dhokiitopolwa yokuushayi kadhi shi oombwanawa, shoka enditha kashona egandjo lyomayakulo ga simana nosho wo ompito dhomahupilo ge li nawa.Olopota oya dhenge omuthindo komashongo ngaashi omakuthikuthi gomakwatathano taga nyangwanyangwa, oopate tadhi kungululwa po komeya, oondjila ihadhi endwa pethimbo lyomvula. Aantu ye li moshiponga oshinene, ngaashi aakulupe, oomeme ye li momategelelo naanaskola, ohaya kala ya gumwa noonkondo.Oshiholelwa, mOshitopolwa shaZambezi, aakalimo yomomukunda Imukusi, gu li owala omukakena gwookilometa 15 okuza moKatima Mulilo, ohaya longitha oondjila ye dhi kokola po yoyene. Oondjila ndhika ihadhi endwa pethimbo lyomvula, naakalimo ihaya vulu we okuya kiipangelo nokooskola.Okakomitiye oka dhenge omuthindo konkalo ondhigu oshigwana hashi iyadha muyo molwa ehumokomeho tali shongola, naanafaalama ohaya nyengwa okufala iilikolomwa yawo yomomapya niimuna yawo komalandithilo. Miitopolwa ngaashi Kunene, hoka kaa ku na naanaa oondjila, aakalimo yaahoka ohaya thiminikwa ya taaguluke omilonga dha nika oshiponga, nolundji shika ohashi etitha omaso.Opoloyeka yokutula oteya kondjila yomamanya yaNkurenkuru-Nepara yuule wookilometa 28, nayo otayi ende kashona mokupwa. Shi ikolela kOmukuluntu pitithi gwehangano lyoondjila lyoRoads Authority Conrad Lutombi, aanakontalaka oya li ya pewa sigo omu Novemba 2024 opo ya kale ya mana iilonga mbika ngele hasho ookontalaka dhawo otaye dhi kuthwa.Opoloyeka ndjika ya simana yoomiliona N$30, oya li tayi kwatakanitha oshitopolwa Kavango Uuninginino nonenendjila yoTrans-Zambezi Corridor. Opoloyeka ndjika oya tamekele mo2023 ashike inaya pwa natango nonande ethimbo olya pitilila.Pethimbo lyetalelepo lye koKavango Uuningino mumvogu, Omupevi Prima minista John Mutorwa okwa kuthilwa ko kutya omolwashike opoloyeka tayi ende kashona. Lutombi okwa ti kutya oonkambadhala otadhi ka ningwa, ngaashi okumbestela kosheendelela otaku ka ningwa ngele tashi pumbiwa.Ngoloneya gwoshitopolwa shaKavango Uuninginino Sirkka Ausiku okwi indile epangelo li endeleleke oopoloyeka dhokutunga oopate, ngaashi opate ya tegelelwa ethimbo nuule yaCharlie Cutline Road. “Oopate odha simana mokukwatakanitha aantu nokweeta ehumokomeho moshitopolwa shetu. Okweenda kashona ihaku yi owala moshipala ehumokomeho ihe ohaku etitha okwaathikepamwe kwi indjipale maantu yetu ye li kiitopolwa yuushayi,” Ausiku a ti.nikanor@nmh-hub.com.na

Ompumbwe yoopate komikunda

Comments

Namibian Sun 2025-01-30

Please login to leave a comment

Ompumbwe yoopate komikunda

Comments

Namibian Sun 2025-01-30

Please login to leave a comment

Login