Aanangeshefa aashona noyopakati ya li moshigongiilonga shUukumwe wAfrika inaya mbilipalelwa

Ehangano lyoNamibia Investment Promotion and Development Board (NIPBD) olya tula uukuni kumwe nehangano lyoNamRA) opo aanangeshefa aashona noyopakati mboka ya li poshigongiilonga shUukumwe wAfrika yaa fute iifendela yokoongamba miilongomwa yawo ya li taya ulike.Kakele, iilandithomwa ya landithwa poshiithanene oya futu iifendela paveta yiifendela yaNamibia. Shika osha tiwa kuumindjela omukuluntu koshikondo shomahwahwameko nomakwatathano, Catherine Shipushu.Okwa popi ndhika konima sho aanangeshefa mboka ya li moshigongiilonga shika, shesiku 9 sigo 13 Septemba mOvenduka, oya yematele noonkondo iifendela mbika, mbyoka ya futithwa opo ya mone omikanda dhokulongela moNamibia ishewe anuwa inaya yakulwa ‘nawa’.EyematoAanangeshefa ya za pondje yoshilongo oya nyenyeta kutya oya futithwa oshimaliwa US$65 (N$1 140) ya mone omikanda dhokulongela moshilongo opo ya kuthe ombinga moshigongiilonga shika, taya ti inaya tala ko okuulika iipindi moshigongiilongi shika ongiilonga( okulanditha) , ashike oye shi kutha ko ongompito yokutseyathana. Mechi Amaah, Omukuluntupitithi nomutoti gwehangano Black’n Natural Cosmetics a yambukile koCameroon, okwa ti okwa “geya noonkondo” sho ya futithwa opo ya pewe omikanda dhokulongela moNamibia. Otwe ya okuulika iipindi. Limwe lyomomalalakano gEhangano lyUukumwe wAfrica okulongitha aanangeshefa aagundjuka mEnenevi... aakuthimbinga yalwe mboka inaya ulika iipindi oya futile omikanda dhawo dhokulongela moshilongo US$32 [ N$560]. Oya fatulula kutya iifuta oyaaniilonga( yaanambelewa). Kandi shi omuniilonga ngame oshoka ihandi kala moNamibia; onde ya nelalakano okuulika iipindi nokutseya yakwetu,” okwa nyenyeta.Okwa gwedha po kutya inaya tseyithilwa, mokuholoka kwawo, kutya oya tegelelwa ya fute iifendela kiilandithomwa yawo mbyoka ya landwa po. “Otandi fekele Namibia ina hala iinima tayi ya moshilongo tayi zi pondje. Otwe ya po medhina lyehangano lyUukumwe wAfrika ando oya kuthile po iifuta yimwe mbika.Okwa ti kutya okukala kwawo moshigongiilonga ashihe oyu uvite kutya inaya yakulwa nawa okuyelekanitha naakuthimbinga yalwe mboka inaya ulika iilongomwa yawo.Omukwashigwana gwaMalawi Precious Di Phiri, omutotipo gwongeshefa yedhina Awawo Africa, okwa ti oya futile iilongomwa yawo yokuulikitha opo ye yi ete moshilongo. “Ongo okangeshefa okashona, katu na iiyemo oyindji niiniwe yokuya monalandithilo gopaigwana. Iifendela otayi tu imbi tu ye komeho noshe tu ningila oshidhigu okupindika.”Okwi indile epangelo lyaNamibia li longele kumwe nehangano lyUukumwe wAfrika okupitilila mOmulandu gwIipindi yaManguluka menenevi nokutala koku yululula iifendela moshikando sha landula ko uuna taya longekidha oshiithanene sholudhi nduka. Oveta ovetaNonande oshigongiilonga shaanangeshefa aashona noyopokati osha li ompito ombwanawa opo Namibia u ulike nkene ta tula miilonga omulandu gwiipindi ya manguluka menenevi, epangelo inali pititha natango momukandanyangidho gwepangelo iifuta yopaipiindi yomulandu nguka.Shipushu okwa ti pethimbo lyomalongekidho goshigongiilonga shika, ehangano lyoNIPDB olya kundathana naNamRA nkene aakuthimbinga itaya futu iifendela, nokonima yaashoka omusholondondo gwiilongomwa tayi ka ulikwa ogwa gandja kuNamRA a tale ngele iifendela otayi pulwa nenge ngele ope nasha shilwe.Okwa ti okuza mpoka NamRA okwa ti iilongomwa yokuulikitha itayi futu iifendela. Okwa fatulula wo kutya nonande oongeshefa oonshona nodhopakati odha pitikwa dhi ulike iilongomwa yadho inaadhi futa iifendela yokoongamba, osha simana okuyelitha kutya iilandithomwa ya landithwa pethimbo lyoshigongiilonga natango otayi gandjelwa iifendela paveta yiifendela yaNamibia. “Ooveta ndhika ohadhi tulwa miilonga ku NamRA okukwashilipaleka otatu iyutha kooveta dhetu. Ope na ompito natango oshigongiilonga shaanangeshefa aashona noyopokati shoka sha li tashi lalakanene okweeta po omakwatathano nokuhumitha komeho iipindi menenevi, ashike shika itashi vulu okuningwa ngele otashi taaguluka ooveta dhoshilongo shetu,” okwa ti. Haipindi owalaAmushanga Omukuluntu muuministeli wiikwameni Etienne Maritz okwa fatulula kutya omufango gokupindika kagu li kombinga yiipindi owala. Ogwa kwatela mo iinima oyindji ngaashi omahwahwamekopindiko, oshiholelwa okuhumitha komeho nokukokeka oongeshefa nokuya momalandithiko galwe, okwa ti.Okwa ti omukanda gwopakathimbo gwokulongela moshilongo ogwa tulilwa po mboka taye ya moshilongo nelalakano lyokulanditha ihe hamolwa iilongo. Omikanda ndhika ohadhi vulu okukala dhokulonga esiku limwe alike nenge uule woomwedhi, ashike ihadhi kondo poomwedhi hamano. “Omukanda gokulongela moshilongo ohagu pewa oohandimwe mboka ye ya kiigongiilonga nokomaulikilo giipindi, ashike ihagu pewa mboka taya ondodha omeho owala,” Maritz a ti. Bulelwa Nkosi, omunawino koshikondo shekoko lyoongeshefa oonshona nodhopokati, iipindi, omatalelepo, iikwafaabulika nomamanya guuyamba mehangano lyUukumwe wAfrika, okwa ti omapulo agehe naga ukithwe koNIPBD. Moshigongiilonga omwa kalwa kaakuthimbinga 300, mwa kwatelwa oongeshefa 36 dhAanamibia.

Aanangeshefa aashona noyopakati ya li moshigongiilonga shUukumwe wAfrika inaya mbilipalelwa

Comments

Namibian Sun 2024-11-15

Please login to leave a comment

Aanangeshefa aashona noyopakati ya li moshigongiilonga shUukumwe wAfrika inaya mbilipalelwa

Comments

Namibian Sun 2024-11-15

Please login to leave a comment

Login