Aahingi yootaxi ya pulwa yiiyuthe kompango

Ehangano lyoNamibia Bus and Taxi Association (Nabta) olya mono omanyenyeto kombinga yaahingi yootaxi yamwe po mboka taya futitha aafaalelwa ondando yili pombanda yomagwedhelo noopresenda 20 ngoka ga tulwa miilonga koRoad Transportation Board, omvula ya piti.

Ngoka ta longo pehala lyOmupresidende gwoNabta, Jeffrey Platt oshiwike sha piti okwa pititha omukanda gwiikundaneki ta popi kutya omupresidende nale gwoNabta ngoka a kuthwa miilonga, Vespa Muunda pamwe naantu yalwe oyo taya futitha aantu oondando ndhoka kadhi li mondjila.

Muunda okwa kuthwa miilonga pakathimbo okutameka momvula yo 2016 omolwa omaihumbato gonayi, pauyelele wa gandjwa kehangano lyoNabta.Pendapala Nakathingo gwehangano lyaNabta okwa pula ooyene yootaxi oshowo oombesa, opo ya kwashilipaleke kutya otaya longitha oondando dhomagwedhelepo goopresenda 20 dhoka dha tulwa miilonga, yo taya ikaleke kokule nokufutitha ookastoma oondando ndhoka inadhi pitikwa. Nabta okwa pula aafaalela ya ninge ekwatathano noNabta nenge opolisi ngele otaya thiminikwa ya fute oondando ndhoka, yo taya tindi woo okufuta oondando ndhoka. Nakathingo okwa lombwele oNamibian Sun kutya okwa yakula omanyenyeto gaafaalelwa taya futithwa omagwedhelo goopresenda 30 oshowo 50 okuya pombanda. Okwa popi kutya aahingi yootaxi yamwe otaya futitha aafaalela oondando dhawo yene. Omunambelelwa omupeha omukomeho gwoompango dhomalweendo, Damien Mabengano, naye okwa koleke kutya uuministeli wawo owa mono omanyenyeto okuza kaakwashigwana mboka taya futithwa oondando dhi li pombanda noonkondo. Okwa popi kutya uuministeli otawu kambadhala okukandula po omukundu ngoka meendelelo nokundulukapo omusholondondo gwoondando.

Okwa gwedha po kutya aahingi yamwe otaya futitha woo aafaalelwa ondando yi li pevi yondando yoopresenda 20 ndjoka ya tulwa po. Nakathingo okwa pula aahingi ya longithe oondando ndhoka dha tulwa po kuNabta oshowo elelo lyoshikondo shomalweendo. Etokolo opo ku gwedhelwe oondando dhomalweendo noopresenda 20 olya ningwa ihe inali tambulwako moshikondo kuyamwe mwakwatelwa ehangano lyoNamibia Transport and Taxi Union (NTTU), ndyoka lya li tali ningi omahwahwaneko opo oondando dhi gwedhelwe noopresenda 50. Shoka osha e ta eningo lyomakanka niikolokosha pokati kiilyo yehangano ndyoka oshowo opolisi momwedhi Apilili nuumvo moka ootaxi dhi li po 40 dhali dha kwatwako kopolisi.

NTTU okwa tegelelwa a kaninge omutumba gwiikundaneki oshiwike shika.

Omagwedhelo goondando dhomalweendo ga hugunina goopresenda 20 oga li ga ningwa mo 2009.