Okashana: Ompangu ya yi moshipala omathaneko gaanahambo

Oshipotha shoka sha tulilwa mo mboka ya yonagula oondhalate ‘dhoohashikeshalye’ mboka anuwa ya kamba ko uulithilo koshitopolwa shOkashana kUukongo waNehale oshe eta ongundu yaanahambo ya yemata ya kankamekwe manga yaa ye we komeho nomathaneko gawo.

MOmaandaha goshiwike sha zi ko, aanahambo 16 yomongundu yaantu ya konda pethele mboka ya yonagula oondhalate dhoofaalama hamano kOkashana moshitopolwa shaShikoto oya holoka mompangu yaMengestrata gwaShomeya (Tsumeb) taya tamanekelwa iipotha ngaashi okufika po omaliko, eyonagulo lyomaliko nokweeta ekulunguto moshigwana.

Aafekelwa - ye li pokati komimvo 30 sigo 72 – oya pewa ombooloha N$3 000 kehe gumwe noshipotha shawo osha indulilwa komasiku 12 Desemba nomakonakono gopolisi otaga tsikile.

Gumwe gomonakuyonenwa, Simon Urbanus Nambahu, okwa tseyithile opolisi kutya eyonagulo lyondhalate ye otali tengenekelwa poN$500 000.

Shi ikolela komakonakono gopetameko, oonakuyonenwa yalwe inaya patulila oonakupogola iipotha.

Inaya teka omukumo

Moonkundathana naNamibian Sun, Ndilula Indongo (59) – omukwateli komeho gwongundu yaanahambo ya yemata, nokwa li a mangwa po wo - okwa ti omolwa oshipotha inaashi tokoka, itaya vulu okuya komeho.

Okwa li ta yamukula komapulo kutya otaya ka katuka onkatu yini sho ya pewa ombooloha ngeyi. “Inatu teka omukumo, ashike shaashi oshipotha inashi tokoka, itatu vulu sha,” Indongo a ti.

Okwa gwedha po kutya inaya kala ya tseya kutya oofaalama odhoolye sigo 14 Septemba, sho yi ikuthile oveta momake gawo.

“Ethimbo alihe, otwa kala nokupula oofaalama odhoolye ihe kapu na ngoka e tu yamukula, ashike ngashingeyi twe ya tseya,” okwa ti.

Indongo okwa endulula mo meindilo lyawo ya popilwe (kwathwe), ye li gandjele ongoshipotolwa shomukandakemo gwawo gweti 5 Septemba gwa nyolelwa ngoloneya gwoshitopolwa shaShikoto Penda Ya Ndakolo. “Evi lyaayehe olyaakwashigwana. Tse aanafaalama yiiyemo iishona notwa hupa miimuna yetu. Otatu ka hupa ngiini ngele iimuna yetu kayi na mpoka tayi napa?” okwa pula.

Uulithilo tau nyangwanyangwa

“Iimuna yetu ngashingeyi otayi thiminikilwa yi nape kooha dhopate nosha nika oshiponga, oshoka otayi vulu okupumwa kiihauto nokweeta iiponga mbyoka tashi vulika yi faalele noomwenyo dhaantu,” Indongo a nyenyeta.

“Inatu hala tu ka lithe popepipepi nEtosha oshoka okokule nomolwa uumbanda kutya iithitikuti otashi vulike yi tu monithe oshiponga pamwe niimuna ye.”

Indongo okwa gwedha po kutya momukokomoko gwomimvo, uulithilo moshitopolwa shokOnooli otau nyangwanywangwa, shoka she eta “oohashikeshalye ya gandje oshimaliwa” opo ya pewe ehala nonande inaya landula omifango dhopamuthigululwakalo.

[email protected]